Kum 2017 November thlaa Myanmar Army leh Arakan Army te inkahna avanga sahimna zawnga India ram chhung, Lawngtlai District chhim lam ramri bul khua, Hmawngbuchhuah leh a chhehvela raltlan inbengbel Myanmar ram lama la kir lova chambangte chu sawrkar laipui Home Ministry thupek angin nimin (02.07.2019) khan Lawngtlai District Deputy Commissioner, Lawngtlai Police leh Assam Rifles te hma laknain an khaw lamah boruak muanawm tak hnuaiah hlawhtling takin thawn kir an ni.

Kum 2017 buaina avang hian Myanmar rama Rakhine hnam mi 1200 vel chu ramri kanin Lawngtlai District chhunga khaw paliah an rawn tlan a. Sawrkarin rei tak chhung District Administration kal tlangin a chhawmdawl a, an khaw hlui lama boruak a ralmuan hnuah a tam zawk chu lettir an ni tawh a. Haw ve duh lova chambang chhungkaw 54 awmin, an vaiin mi 219 an ni a. Home Ministry chuan he'ngho hi thawn kir vek tura a tih angin thawn kir beihpui hi thlak a ni.

He'ng raltlante thawn kir tur hian June ni 30, 2019 khan District Administration, District Police leh Assam Rifles chuan Myanmar Army te nen Indo-Myanmar Flag Meeting neiin, Myanmar Army lam chuan raltlante hi an ram lama kir tura an pawm thu sawiin, lo buaipui zui an tiam a, anmahni thawn kirna tur lawng pawh rawn tirh an tum thu an sawi a ni.

July ni 1 (thawhtanni) khan raltlante thawn kir turin an mamawh hrang hrang buatsaiha inpuahchah a ni a. Thawhlehni zingkar atangin Lawngtlai Bawrhsap Pi Shashanka Ala, IAS, Superintendent of Police Pu Amit Goel, IPS leh Assam Rifles Brigadier te kaihhruaina hnuaiah raltlante thawn kir beihpui hi thlak a ni a. A tirah lawng hmanga thawn kir tura ruahman ni mah se, Myanmar Army lamin lawng an rawn tirh tura an sawi an rawn tirh si loh avangin Gypsy awm ang ang hmangin Laitlang thleng thiar chhoh an ni a. Sipai venna hnuaiah kein Border Pillar (BP) 8 thleng kalpui niin, ramri hi kantir an ni a. Ramri an rawn kan let tawh loh nan sipaiin an veng zui nghal a ni.

Raltlante hi an thawmhnaw leh bungrua an ken theih ang ang kentir an nih bakah, an ken theih bak chu lawng hmangin thiarsak an ni a. Chawlhkar 2 chhung atana an ei tur pawh chhek khawlsak niin, an awmna khaw lamah dahsak an ni a. Thawn kir an nih hnu hian Hmawngbuchhuah VC leh YLA-te tanpuinain he'ng raltlante chenna in 54 chu luah zui theih loh turin thiah nghal vek a ni bawk.