Chakma Autonomous District Council (CADC) a Dr B.D. Chakma chhuahsan tak 2-Borapansury-II bialah ruahman lawk anga June ni 4, 2014 ah by-election neih theih a nih tak loh avangin Mizoram State Election Commission chuan by-election neih ni atan July 2, 2014 a ruat.

SEC hriattirna ang chuan 13.6.2014 khian Returning Officer ten inthlan hriattirna Notice of Election an chhuah ang a, inthlan chuh tumte tan 19.6.2014, tlai dar 3 thleng hming pek luh theih a ni a. Hming pek luhte hi 19.6.2014 chawhnu dar 3 hnulam atangin endik tan a ni ang a, inhnukdawh duhte tan 20.6.2014 tlai dar 3 thleng hun hawnsak an ni ang. Candidate te chhinchhiahna symbol chu 21.6.2014 zing dar 10 atanga chawhnu dar 1 inkarah tih fel a ni ang a, hemi ni vek chawhnu dar 1 leh tlai dar 4 inkarah Candidate te hming tarchhuah a ni ang.

Inthlan chu 2.7.2014, zing dar 7 atanga tlai dar 5 thleng neih tur a ni a. Inthlan that (re-poll) ngai a awm a nih chuan a tuk July ni 3 ah re-poll neih a ni ang. July ni 4, zing dar 10 atangin vote tla te chhiar a ni ang a. He inthlan kaihhnawih thil zawng zawng chu 7.7.2014 a zawhfel tur a ni.

Inthlan puan a nih tak avang hian Model Code of Conduct chu Chakma Autonomous District Council huamchhungah vawiin atang hian hman tan nghal a ni.