Mizoram Governor thupek angin Lawngtlai District Bawrhsap Pu N. Chakhai MCS kaihhruaiin vawiin khan CADC Session Hall-ah Chakma Autonomous District Council (CADC) sawrkar siam thei tur fiahna 'floor test' buatsaih a ni.

 Vawiina floor test buatsaihah hian CADC-a member 12 an tel a. Ban pharin Chief Executive Member ni lai Pu Shanti Jiban Chakma kaihhruai Executive Committee thlawptu leh eptu leader Pu Rasik Mohan Chakma-in sawrkar siam tuma a chuh thlawptu zawn niin, CEM ni lai Pu Shanti Jiban Chakma thlawp zawngin vote khat (1) a tla a, eptu leader ni lai Pu Rasik Mohan Chakma thlawptu mi sawmpakhat (11) an awm thung.

January ni 14 leh ni 15-a CADC thlasik ṭhut khawmah khan eptu MNF lam hian CADC Chairman leh CEM ni laite chu rin tawk lohna (no-confidence) motion hmanga paihthlain, CADC-a sawrkar siam an ngiat a. BJP kaihhruai rorel lai party lam chuan eptu party-te chu dik lo taka cheah puhin, felfai taka CADC a kal theih nan Governor chu inrawlh turin an ngen a. Hemi bawhzui hian Mizoram Governor chuan Lawngtlai Bawrhsap chu floor test buatsaih tur hian a ti ta a ni.