Vawiin khan Higher & Technical Education Minister Dr.R.Lalthangliana chuan Secretariat Conference Hall, Aizawl-ah Mizorama College leh zirna in sang zawng zawnga Principal-te chu inhmelhriatna leh kumthar atana inhlantharna neihna hun hmang turin a kokhawm a. He meeting hi H&TE Commissioner Pu Biaktluanga, IAS-in a kaihruai a, Mizoram District 8-a Govt. College Principal te, Mizoram Polytechnic Principal te, Mizoram Law College Principal, Mizoram Hindi Training College leh Institute of Advanced Studies in Education (IASE) Principal te bakah RUSA, RMSA, Mizoram Scholarship Board leh H&TE Department officials pawimawhte an tel.

H&TE Minister Dr.R.Lalthangliana chuan tun sorkarah hian dinhmun pawimawh tak, Mizoram zirna sang berte ekawlna hna pek a nihnaah thawhhona tha leh langtlang ta, harsatnate inhriatthiamna nena thawhho a nih loh chuan hmasawn a har dawn a, chuvangin vawiina meeting-ah hian Mizoram College leh zirna in sang dangte Principal te nena inhmelhriatna hun neih theih chu a lawmawm hle a ni a ti. Sorkarin zirna kalphung tura a duan ‘New Education Policy’ chu ngaih pawimawh zel turin a hrilh a, college leh zirna in sang dangten mamawh leh harsatna an neite chu a hnenah emaw Department lam hotute hnenah hrilh zel turin a chah bawk. Minister chuan a ngaih pawimawh zual thil thenkhat a tarlante chu - mamawh tak tak anga zirtirtu dah (need-based teaching faculty) te, Campus infrastructure-ah a bikin Principal leh teaching faculty quarter sak te, zirtirna hmanrua (teching equipments) te, transfer & posting dan mumal tak nei te leh Mizorama central university awm sa Mizoram Univesity nena thawhhona tha neih zel te a ni. Minister Dr.R.Lalthangliana chuan College Principal leh hotu dangte tan ‘Know Your Student’ hi a pawimawh hle a, zirlaite chu an thiam dan leh an chak lohna laite hriatchian sak a, an mamawh ang taka zirtir theih chu duhthusam a ni a ti. Student Counselling te, parent-teacher inlaichinna tha siam te, sokar zirna in sang zawng zawngah an building-te chu rawng inang hnawih a rawt bawk. 

Vawiin meeting-ah hian zir inte hian an mamawh leh harsatna te Minister hnenah an thlen nghal a ni :- Zirtiri Residential Science College, RUSA, IASE, Mizoram Scholarship Board, Mizoram Polytechnic Lunglei, Women’s Polytechnic, Mizoram Hindi Training College, Govt. T.Romana College, Govt. JB College, Govt. Siaha College, Govt. Lawngtlai College, Govt. Saitual College, Govt. Kolasib College, Govt. Champhai College, Govt. Aizawl West College, Govt. Aizawl College, Govt. Hrangbana College leh Govt. Aizawl North College.

Minister leh H&TE Department hotute chuan lawmthu sawiin a tul ang zelin an harsatna hrang hrang phuhruk tum a ni ang a, a tul dan angin meeting pawh koh leh a nih tur thu an hrilh bawk.