4499/2024-2025

Lawngtlai, 28th February 2025 : CADC VC inthlan lo awm tur atan a inbuatsaihna kal zelah  vawiin khan State Election Commission (SEC) atanga lo kal Dr. H. Lalthangliana, State Election Commissioner, Pu K. Laldingliana, Secretary leh Pu Vanlalchhuanawma Chawngthu, Dy. Secretary,  te chuan Election Official leh Political Party aiawhte DC Conference Hall- ah thutkhawm an neihpui a. Pu Cheemala Siva Gopal Reddy,IAS, District Election Officer (DEO) chuan thutkhawm hi a kaihruai.

Dr. H. Lalthangliana, chuan CADC Village Council inthlanna lo awm tura hmalakna hrang hrangte a hmun ngei a kal a endik  leh Party- te hnena ngenna siam tura lo kal  an nih thu a sawi a. Inthlanna fel fai leh thianghlim awm tura Election Official- te hmalakna fakawm a tih thu sawiin,  an thil hmuh  chinah  SEC mit a tlung hle tih a tarlang. State Election Commissioner chuan zalen leh thianghlim taka inthlanna awm turin political party - te chu thawhpuiah sawmin, theihtawpa election official- te lo tawiawm turin a ngen a. Ballot paper hman a nih dawn avangin vote thlak dan, vote thi awm theih dan zawng zawngte chu an party mi leh sa te chiang taka hrilh turin party aiawh lo kalte a chah.

Vote chhiar chungchangah fimkhur a tul tih  sawiin, Dr. H. Lalthangliana chuan official - te chu  fimkhur zual turin a chah a. A bik takin political party aiawhte pawh vote chhiar that ngai nia an hriat pawhin a hun laia 'complaint'  siam tur leh dan ang taka thil kalpui  turin a sawm a. Party-  tin ten theihtawp an chhuah dawn tih a hriatthiampui tih tarlangin, Dr. H. Lalthangliana, Election Commissioner, chuan tan lâkah chin tawk nei tura chahin, ralmuang leh tluang taka inthlanna awm turin Party zawng zawngte  thawhpuiah  a sawm nghal bawk.

Pu K. Laldingliana, Secretary (SEC) pawhin thu tawi sawina neiin, mi tam zawkin vote an thlak ngei theihna turin theihtawp chhuah a tul hle a ti a. A bik takin party hruaitute chu  an party mi leh sa vote nei zawng zawngte vote thlak vek tura sawm turin a ngen a, inthlanna lo awm turah party tinte duhsakna a hlan tih a sawi bawk. Pu Cheemala Siva Gopal Reddy, District Election Officer, chuan inthlanna felfai leh thianghlim awm tura DEO hmalakna hrang hrang a tarlang a. Pu Lokeshwaran R., Superintendent of Police, Lawngtlai pawhin dan leh thupek ken kawh kawnga Police hmalakna hrang hrang a tarlang a ni.

Vawiin thutkhawmah hian Election Official- te bakah political party atangin  BJP, INC, MNF leh ZPM aiawhte an tel thei a, zawhna leh chhanna hun hman nghal a ni.