4500/2024-2025

Aizawl the 28th February, 2025: 28.02.2025 (Zirtawpni) chawhnu dar 1:00 PM khan Mizoram State University din tur chungchanga Non-Government Organisation Co-ordination Committee, Lunglei aṭangin Lungleiah dah ni se tih leh, Champhai District NGO Co-ordination Committee aṭangin Champhaiah dah ni se tih sawrkara lo lut chu sawi ho a ni a. Sawi hona hi Higher & Technical Education Minister Dr. Vanlalthlana chuan kaihruaiin Pi Lalrinpuii, Minister & MLA, Lunglei East te; Pu V. Malsawmtluanga, MLA, Lunglei North; Pu Lalramliana Papuia, MLA, Lunglei South-te; Er. Ginzalala, MLA, Champhai North-te leh Higher & Technical Education Department officer-te an tel a ni.

Meeting chuan NGO-te dilna hi tih awm tak nia ngaiin a hrethiam hle a. Chutih laiin, Mizoram Sawrkarin State University din tura hma a lo lak tawh dan leh din ngei ngei a ngaih dante inhrilhfiah a ni a. National Education Policy (NEP) 2020-in a phut angin Central University-te chu 2035 aṭangin research-intensive university a nih a ṭul tawh dawn a. Central University-ten degree an pek tawh dawn loh avangin State University-ten an pek a ngai tawh dawn a, chumi tur chuan Mizoramin State University a neih ngei a ngaih tawh thu sawi lan a ni.

State University nei tur hian sum tam tak sen belh a ṭul dawn a. Mizoram Sawrkar sum dinhmun a ṭhat tawh loh avangin State dangte tih dan pawh a hmuna tlawha zir chian a ni a. State University hi campus zau tak neia din chu duhthusam a nih rualin, Mizoram Sawrkar sum dinhmun thlirin chu chu kalpui theih dawn loha ngaih a ni a. Chuvang chuan, State ṭhenkhatten State University an kalpui dan angin college neih sa te hmang ṭangkaiin Mizoram State University chu clustered university kal phunga din turin Mizoram Sawrkar chuan hma a la ta a. NEP 2020 duh dan angin State University chu multidisciplinary-a kal a ngaih avangin college eng emaw zah chu sawi khawm (cluster) tum niin, resource neih sa inhman ṭawm theih chu inhman ṭawm tura ruahmanna siam a ni.

Hemi mil hian Mizoram State University Bill, 2025 chu Assembly Session kal lai mekah hian theh luh a nih thu inhrilh fiah a ni.