World Vision chuan kum 23 chhung zet Mizoramah CARE (Centre for AIDS Rehabilitation and Education) Project an kalpui hnu ah vawiin khan Project kharna hun Hrangban College Golden Hall ah an buatsaih a, Health & Family Welfare Minister Dr. R. Lalthangliana chuan khuallian niin a hmanpui.

World Vision hian Aizawlah in bunin CARE Project hi kum 1996 atangin an kalpui tan a, Project hrang hrang pathum hnuaiah HIV+ leh AIDS vei bakah ruihhlo vanga buaite tanpui leh chhawmdawl hna nasa takin an thawk a. Mizorama an awmchhungin phase thum in hna an thawk a, a hmasa berah CARE PROJECT kum 1996 – 2011 khan kalpuiin hemi hun chhung hian Aizawl District chhunga HIV/AIDS veite, Drugs inchiu thin te leh nawhchizuarte  chhanchhuah leh chhawmdawl  hna an thawk a, kum 2012-2016 chhungin CARE BALSWASTHYA PROJECT Aizawl, Kolasib leh Champhai district ah te an kalpui leh a, kum 2017-2019 chhungin CARE AIZAWL PROJECT Aizawl, Kolasib leh Champhai district ah an kalpui a ni.

CARE AIZAWL PROJECT hnuaiah hian kum 2018 atang khan Aizawl district bik atan Graduation Model Approach an kalpui a, HIV/AIDS leh drugs vanga harsatna tawk mirethei zual chhungkaw 240 thlanchhuah niin eizawnna hrang hrang ran vulh, lumehna dawr, puanthuina etc. bul an tan sak a. He programme in a tum ber chu sum lakluhna mumal neilo mirethei chhungkua ten eizawnna bulfuk tak an neih a awmze nei zawk leh mumal zawka sum an lakluh theihna tura tanpui a ni.

Vawiin hun hmanpui tu Health Minister Dr. R. Lalthangliana chuan World Vision ten Mizorama hmalakna ropui a tih thu leh lawmawm  a tih thu sawiin Mizoram an chhuahsan hnu pawh a an hmalak lehzelna turah duhsakna a hlan a, Mizirama NGO tam tak an awm a, World Vision kalphung erawh a danglam bikin entawn tur tam tak a awm a ni a ti. Mizoram chu ziak leh chhiar tam lamah India ramah a sang pawl kan nih laiin mipui awm zat atanga tehin India ramah HIV+ vei tamna berk an nit hung sim hi a lungchhiatthlak tak meuh a ni a ti a, World Vision hmalakna te pawh hi anmahni awm tawhlo mahse mipuiten kan chhunzawm zel theih a duhawm hle a ni a ti a. HIV/AIDS leh ruihhlo vanga chhungkaw buai te an buaipui kawngah tisa damna bakah thlarau damna leh an damkhawchhuahna tur atana eizawnna thlenga an ngaihtuahsak thin chu ropui a tih thu a sawi.