Vawiin chawhnu khan Health & Family Welfare Minister-in Durtlanga Synod Hospital a tlawh a, thawktute nen inkawmhona hun tha tak neiin Mizoram Health Care Scheme thar kalpui a nih dan tur te leh thil pawimawh hrang hrang an sawiho a, Minister hi Health & Family Welfare Board Vice- Chairman Dr. Thiamsanga, MLA in a tawiawm a ni.

Minister hian Synod damdawi in hotute leh daktawr nen an inkawmna ah hian Synod damdawi in leh Health Department ten thawhhona tha an neih thinah lawmthu sawiin thawhhona tha neih chhunzawm zel a beisei thu a sawi a, damdawi in tihchangtlun kawngah kohhran lam atanga tih remchang silo sawrkar lam atanga tih theih ang chi a awm a nih chuan theih ang ang a tan lak an inhuam thu a sawi a. Sawrkarin kumin October ni 1 atanga Health Care Scheme thar a kalpui tur pawh synod damdawi in pawhin thlawp a tha taka an kalpui ngei a beisei thu a sawi a. Health Care Scheme thar chu langtlang taka kalpui tur a nih avangin engmah thuhruk a awm dawn lova, inenkawlna rate zawng zawng pawh sawrkarin notification a chhuah vek dawn a ni a ti.

Dr.  Biakthansangi, CEO, Mizoram Health Care Society in Health Care Scheme thar chungchang sawifiahna hun a hmang a, Health Care Scheme thar chu tun hma a Health Care Scheme te aia changtlung zawk a ni a ti a. Insurance Company te nen an thawkho tawh dawn lova, Trust mode a kalpui tur niin Mizoram Health Care Society in a enkawl dawn avangin damlo enkawlna senso pawh ba lova pek tlak nghal zel a nih dawn avangin Private hospital leh kohhran damdawi in te tan pawh hlauhthawn tur a awm lova, damlo enkawlna senso pawh sawrkar hnathawkte enkawlna rate nen in ang a siam a nih dawn thu a sawi a ni.

Mizoram Health Care Scheme leh Ayushman Bharat Pradhan Mantri Jan Arogya Yojana (AB-PMJAY) hi  a hranga kalpui tur a ni a, heng scheme pahnih hi October ni 1, 2019 atanga hman tan tur niin policy pakhat hian kum khat chhung zel a awh ang. Mizoram Health Care Scheme ah hian AB-PMJAY hmang theilo BPL, APL leh sawrkar hnathawk ten sawrkara an bill sak theih loh chhungkaw member zawng zawng an inziaklut thei dawn a, he Scheme hnuaia inziaklutte hian damdawiina an inenkawlna senso chhungkaw khatin kum khat atan Rs. 2,00,000/- thlengin an bill thei dawn a, Mizoram chhung bakah phai lama inenkawlna te pawh a huam tel dawn a, inenkawlna bill theih tur chu Mizoram sawrkar bithliah 'notified' rate ang a ni ang. He scheme hnuaiah hian September-November,2019 chhung inziahluhna hun hawn a ni ang a, BPL tan Rs. 100/-, APL tan Rs. 1000/- in inziahluh theih a ni. He Scheme hnuaiah hian damlo admit ngai ten an bill thei dawn a, natna zawng zawng deuhthaw an bill theih dawn bakah admit kher ngailo tan natna chi hrang hrang 26 ah opd inentirna a bill theih dawn bawk a, BPL zunthlum vei insulin mamawh chin tan OPD a inentirna a bill theih dawn a, ruihhlo leh zu avanga natna tuar damdawiina in admit te pawhin an bill thei dawn a ni.

Synod damdawi in hi kum 1928 khan Nursing School nena din a ni a, a tirah daktawr 1 leh nurse 1 leh khum 14 a bul tan niin, tunah hian daktawr 36 leh nursing staff 203 leh khum 355 an nei tawh a. B.Sc Nursing College din turin hmalak mek a ni.

Synod damdawiin hotute pawhin Health Minister in ngai pawimawh a a tlawh chu an lawmthu sawiin an ngaihpawimawh leh harsatna te an sawi a, Health Care Scheme thar pawh an lo zirchian tur thu leh Hospital Board thutkhawm hunah thutlukna siam theih an beisei thu an sawi a ni.