Vawiin khan Mizoram Police hnuaia CID (Crime) chuan Crime And Criminal Tracking Network and System (CCTNS) project chak zawka a kal theihna turin CCTNS Data entry MPRO-te tan ni li chhung training SCRB Training Hall, SP Aizawl Building-ah a buatsaih a. DIG Southern Range/Intelligence Pu Neihcungnunga, IPS chuan training hi a hawng a ni.

CCTNS hi National E-Governance Development Plan (NeGP) hnuaia mission mode project pakhat a ni a. Project in a tum ber chu police station hna hrang hrang Information Technology (IT) hmanga tihchangtlun a ni. Police hna computer hmanga thawh theihna tura hmalakna a ni. CCTNS hmang hian State Data Centre-ah police station-a data hrang hrang lakkhawm leh vek niin awlsam takin zawnchhuah theih a ni. Misual chhui kawngah te, rang taka file zawnchhuah te, case hrang hrang thlunzawmnaah te a tangkai hle a ni. Mizoram CCTNS hi 2012 atanga tan niin Police Station 39 leh Higher officer 52 network hmangin thlunzawm an ni a, hnathawh nan Core Application Software (CAS) Police Station tinah dah a ni. MPRO ten CCTNS hi an enkawl a. Training naah hian batch khatah mi 20 zel an awm a, tun ami hi batch hnihna an ni. Police Department a lut thar tur te pawh CCTNS training hi pek zel tum a ni.