Central sorkara Information Communication Technology department a Joint Secretary Dr. Ajay Kumar chuan vawiin chawhnu khan Chief Minister Pu Lal Thanhawla chu a office ah hmuin, ICT hmalakna te leh hmachhawpte a sawipui.

Dr. Ajay Kumar hi New Delhi atangin Asuni Kumar Sharma, Managing Director, NEILIT leh A.K.Pipal, Additional Director, NEILIT ten an rawn tawiawm a. Dr Ajay te hian ICT in NEILIT Aizawl centre chu a dinhmun chawikan (upgrade) an tum thu leh Lungleia NEILIT in thalaite training pe thei tura siam an tum thu Chief Minister chu an hrilh a. NEILIT Aizawl centre chu state te zinga ti tha ber a ni an ti a. Chief Minister chuan Lungleia NEILIT hmun tur ram pawh tih fel tawh a ni a ti a. Mizoramah triple certificate course computer concept hmanga IT literacy chawikang turin beihpui thlak tum anih thu an sawi bawk a. Hemi atan hian sum lamah harsatna a awm lovang tih Chief Minister hi an hrilh a ni.

Chief Minister chuan Mizoramah internet connectivity a that tawk loh thu hrilhin, Service Provider kan neih BSNL chu duhthusam a tlin loh thu Dr Ajay team chu a hrilh a. Mizoram tana Central sorkar ICT department ruahmanna te chu lawmawm a tih thu sawiin, bul tan thuai thei se a duhthu a hrilh nghal a. A hnathawhte pawh Chief Minister Office atanga vil a ni ang tih a hrilh bawk a ni.

Dr.Ajay Kumar chuan Mizorama BSNL dinhmun Chief Ministerin a sawi chu Delhi ah an hotute alo sawipui tur thu a sawi bawk a ni.