Vawiin khan Central Jail, Tanhril-ah Non-Communicable Disease chungchang inhrilhhriatna leh jail tang te tan Free Clinic neih a ni a. He hunah hian Health Minister Pu Lal Thanzara chu khuallian niin, Aizawl Civil Hospital-a Central Jail inmate inentir tur te tan a thlawn in OPD Card an lak theih tawh tur thu a puang a ni. He hun hi National Programme for Prevention & Control of Cancer, Diabetes, Cardiovascular Diseases & Stroke (NPCDCS), Mizoram leh National Programme for Prevention & Control of Deafness (NPPCD) tangkawpin an buatsaih a ni.

Health Minister chuan Sorkar-in a theih ang tawka Central Jail mamawh phuhruk tura hma a lak thin thu leh, duh ang tawk a hman tur sum leh pai a awm thinloh avangin Sorkar leh inmate-te duh ang zawng zawng chu tih theih rihlo chin a awm thu a sawi a. An mamawh tul zual te chu a remchan dan anga ngaihtuah zui sak zel a tiam bawk a ni. Minister chuan jail tangte tan chhan chu engpawh ni se, beidawnna a inhneh tir lo turin a chah a. An taksa leh rilru hrisel taka vawng in, mahni awmna theuh atangin midang tan malsawmna kan ni vek thei tih hre turin a chah a ni.

He hunah hian Dr. K. Ropari, Principal Director, H&FW chuan thu sawi bawkin, khawi hmunah pawh awm ila Non-Communicable Diseases kan tih ang ho natna langsar zual heng – cancer, zunthlum, BP sang, lung leh thisen zam natna, stroke khuh benvawn lakah hian kan ei leh in leh nun dan tidanglamin thui taka a inven theih thu a sawi a ni. He hunah hian Dr. Eric Zomawia, State Nodal Officer (NCD) chuan Awareness Campaign a nei bawk.

Vawiin NCD Awareness Campaign hi Pi Zoramthangi Hauhnar, IG (Prisons) chuan a kaihruai a. Health Care Scheme hnuaiah Life Imprisonment Convict (Lifer)-te chu ziahluh an nih ve tawh bakah Smart Card pawh nimin mai khan an dawng a. Hei hi convict zingah chhungte nei mumal lo an awm thin avangin natna an neih changa an vanduai lutuk bik loh nana ruahman a ni. Awareness Campaign zawh hian Free Clinic neih chhunzawm nghal a ni a. Health & Family Welfare Department atangin doctor 12 bakah staff engemawzat kalin inmate-te hi nilengin an en a ni.

Central Jail-ah hian tun dinhmunah staff thawk mek mi 133 an awm a. Medical Officer pakhat, Head Pharmacist pakhat, Staff nurse pathum an awm a ni. Vawiin thleng hian tang (inmates) 708 awmin, an zinga 63 hi hmeichhia an ni a. Under Trial Prisoner 314, Life Imprisonment Convict 38, Rigorous Imprisonment Convict 135, Simple Imprisonment Convict 219 bakah naupang (hmeichhe inmate fa) pahnih an awm a ni.