Union Minister of State for Agriculture, Animal Husbandry & Dairying, etc. Dr Sanjeev Kumar Balyan chuan nimin khan zan khat riak turin Mizoram a rawn tlawh a. Nimin tlai dar 4:30 khan College of Veterinary Sciences & Animal Husbandry, Central Agricultural University (CAU), Selesih ah cheng vaibelchhia 11.23 senga sak thar Teaching Veterinary Clinical Complex (TVCC) leh cheng vbc 17.55 senga sak thar New Academic Block building te chu a hawng. Union MOS hian CAU hmalakna hrang hrang pholanna exhibition Veterinary Hospital building-a neih chu a hawng nghal a, loneitute nen inkawmna hun hmang zuiin harsatna leh mamawh an neih hrang hrangte an sawiho a. Chanchinbu mi te nen inkawmna hun an hmang bawk.

TVCC leh Academic Block hawnna inkhawm Auditorium-a neih ah Dr Sanjeev Kumar Balyan chuan thu sawiin College of Veterinary Sciences & Animal Husbandry, Selesih chu Junior Research Fellowship (JRF) neih tam ah leh kawng hrang hrangah ram pum huapa veterinary college tha berte zinga mi a ni pha chu chhuanawm a tih thu a tarlang a, tuna zirlaite tana seat awm zat pawh tihpuna tihlen zel a duhawm thu a sawi. Veterinary College din chhan ang taka ran enkawlna leh intodelhna kawngah Mizoram state tihchangtlun chu an hna pawimawh ber a ni tiin chumi tihlawhtling ngei tur chuan tan la zel turin a chah bawk.

Khualzahawm Pu C.Ngunlianchunga, MOS for AH&Vety. etc. pawhin thu sawiin Mizoram mipui vawksa mamawh sang tak phuhruk nan leh vawk chi tha zawk vulh a nih theih nan sap ram England emaw Netherlands atangin vawk lakluh dilna Mizoram Sawrkar-in Central Sawrkar-a a lo thlen tawh te leh, National Livestock Mission hnuaia zau taka hmalakna tura Mizoram Sawrkarin rawtna hrang hrang Central Sawrkara a lo thehluh tawh te chu a tul anga lo bawhzuisak turin Union MOS chu a ngen bawk a ni.

Building thar hawnna inkhawm ah hian Vice Chancellor Prof. M.Premjit Singh pawhin thusawina hun a hmang a, CAU leh Veterinary College dinhmun tlangpuite sawiin Union MOS chu hmarchhak loneitute chawikanna kawnga an hmalakna te ah hma lo lakpui zel turin a ngen a ni.

College of Veterinary Sciences & Animal Husbandry, Selesih, Aizawl hi Central Agriculture University, Imphal hnuaia awm niin hmarchhak state 6 (Arunachal Pradesh, Manipur, Meghalaya, Mizoram, Sikkim leh Tripura) te pualin kum 1997 khan din a ni a. Tunah hian department 17 neiin BVSc.&AH, MVSc leh PhD zirna a awm a, Mizoram hmun hrang hrangah ran 20,000 chuang endikin Animal Health Camp vawi 47 an buatsaih tawh a, loneitu 800 hnenah training an pe tawh bawk a ni. India Sawrkar chuan Thenzawl, Mizoram ah Horticulture College thar din turin a pawm tawh a, hemi atan hian Mizoram Sawrkar chuan ram 120 ha a pe fel tawh a, kum 2016 ah bultan tura ruahman a ni.

TVCC leh Academic Block thar hawnna ah hian AH&Vety Commissioner Pu K.Lalnghinglova, IAS leh AH&Vety Department leh Agriculture Department hotute an tel a ni.