Aizawl a cham mek Central Multi-Diciplinary High Power team te chu vawiin khan hmun thumah inthenin Aizawl leh a chhehvela NLUP hnuaia hmalakna tur hmun pawimawhte an tlawh a. Dr. Surjit Nayak, Livestock Officer, Deptt. of AH & Dairying and Fisheries chuan Selesih-a AH & Vety Deptt. farm tlawhin helai hmuna vawk vulhna leh vawk kah raina an kalpui dante, ar leh sai ar vulhna leh a no awp keuna te a en.
Selesih Farm-ah hian vawk chi tha a chi thlah tura khawi lai 15 awmin Aizawl leh a chhehvela vawk vulhtute hnenah kar tin vawi hnih heng vawk chi tha chi hi Department chuan pe chhuakin an vawk te a kah rai sak thin a. Hetiang Artificial Insemination tihna hi Aizawl bakah Lunglei, Champhai, Serchhip ah eh Kolasib-ah te kalpui a ni bawk. Vawk kah rai nan hian vawk pakhatah 80ml hman a ni tlangpui a. Department chuan kartin dose 90 vel hmangin vawk kah rai hna hi an thawk a ni. Hmarchhak state zingah Mizoram chauh hi hetianga vawk vulhna tura artificial insemination kalpui awmchhun a ni. Dr. Nayak-a chuan Vety. Department ten hemi kawnga harsatna an neihte, vawk kah rai naute thanlen chhoh dante leh hmasawnna tura Department in hmachhawp a neihte chik takin Vety. Department hotute a zawtfiah a. Selesih Farm a tlawh hnuin Sihphir-a Iskut chinna hmun a tlawh tel nghal a. Hetah hian Iskut chingtute kawmin an hnathawh dante a ngaithla bawk a ni.
Dr. Nayak-a hi AH & Vety. Director Dr. L.B.Sailo leh Vety. Doctor dangten an tawiawm a, Sihphir a tlawh hnuin Durtlang chhehvela Anthurium chinna hmun pawh a en nghal bawk a ni.
Dr. Nayak-a hi AH & Vety. Director Dr. L.B.Sailo leh Vety. Doctor dangten an tawiawm a, Sihphir a tlawh hnuin Durtlang chhehvela Anthurium chinna hmun pawh a en nghal bawk a ni.
Dr.P.Paul Pandian, Dy.Adviser, Planning Commission leh Pu S.K.Singh, Director, Department of Rural Development, Govt . of India ( i/c NAREGA) te chuan Aibawk Development Block hnuaia IAY scheme dawngtute leh NAREGA hnathawh dan an en a, heng bakah hian Aibawk a Accelerated Power Development and Reform Programme (APDRP) hnuaia thawh 33 KV Power Sub Station an tlawh a. He Sub Station sak nana estimate chu cheng nuai 230.02 a ni a, February 2010 hian zawhfel beisei a ni. Sub Station hian khaw 27 power a chawm thei tura ruahman a ni.
Team hian Sateek to Phulpui kawng PMGSY hnuai a laih km 5.65 a sei chu an en a, heihi cheng nuai 122.56 senga laih niin February 4,2002 khan laih tan niin May 31, 2004 zawhfel a ni. Dr.Pandian leh Pu SK Singh te chuan thingtlang mi te chu chipchhiar taka kawmin NAREGA ah hian hmasawnna tur leh siamthat ngai lai te an zawt a, khawtlangin an hlawkpui dan te an zawt bawk. He team hi Rural Development Department a officer te bakah Planning Departement Officer ten an tawiawm a ni.
Central Multi-Diciplinary High Power team te hian tukin zing khan Chief Minister Pu Lal Thanhawla chu a bangla ah hmuin an kawm a, hetah hian Planning Adviser Pu P.L.Thanga chuan Chief Minister hi a tawiawm a, Chief Minister chuan Central Multi-Diciplinary High Power team te chu tukthuan a kilpui a ni.
