Mizorama sorkar laipui programme hrang hrang kalpui dan thlithlai tura rawn zin Multi-Disciplinary High Power Team hotupa Pu S.N. Brohmo Choudhury chuan Reiek leh a chhehvela JNNURM, SSA, ICDS, NRHM, NREGA bakah Horticulture lama hmalakna awm mek te chu a tlawh kual a. Reiek panna kawnga Greater Aizawl Water Supply Scheme Phase I & II te pawh a hmunah PHE Officials te nen an fang kual a ni.

 

 

Sorkar laipuiin JNNURM kaltlanga khawpuia mirethei in nei lote tana hamthatna a siamsak Basic Services to Urban Poor hnuaia awmna tur in Economically Weaker Section (EWS) Housing, Lawipu hmuna sak mek chu Pu Choudhury hian a tlawh hmasa ber a. He EWS Housing-ah hian Block 25.5 sak mek a ni a, chhungkua 408 an awm thei dawn a ni. Hemi hnuah hian Pu Choudhury chuan Dilhmunzawl-a National Horticulture Board hnuaia Anthurium chinna hmun Dei Gratias Flowers hmun a tlawh nghal a. Mizoram tan anthurium chin chu sumdawnna hlawk tak, chhungkaw dinchhuahna tham tak tak a nia a hriat thu a sawi.

National Rural Health Mission kaltlanga Reiek Primary Health Centre hnena ambulance leh mamawh thildangte pek chu High Power Team hian a hmunah kalin an endik  bawk a. Reiek PHC CMO leh Doctor ten an harsatna tawh leh an mamawhte Team hotu hnenah an thlen nghal a ni. Reiek Govt. Middle School an tlawhnaah SSA hmalaknaa Computer Education, Cluster Resource Centre leh Mid-Day Meal Scheme chungchang chipchiar takin zirtirtute nen an inkawmhonaa Team member ten an zawt a. School hnathawkte chuan an harsatna tawh lian ber zirtirtu indaihlohna a nih thu Pu Choudhury an hrilh. Hemi hnuah hian High Power Team chuan Reiek Anganwadi an tlawh leh a, sorkarin a thlawna naupangte zirna hmanrua leh eitur chaw tha chi hrang hrang a pek an dawng tha chu lawmawm an tih thu an sawi.

High Power Team hian SGSY hnuaia Reitlangpui Multipurpose Self-Help Group ten aieng siamna Zoram Turmeric Processing Industry hmun an tlawh leh a. Reiek khaw mipuiin tangrual taka nitin mamawh aieng thianghlim leh pawlhdal miah lova hlawhtling taka an siamchhuak thei chu a ropui hle a ni tiin High Power Team ten tanpui zel dan tur an ngaihtuah sak tur thu an hrilh a ni. NREGA hnuaia Job Card Holder zawng zawngte chu Reiek Community hall-ah kokhawmin an harsatnate an sawipui bakah Reiek khua-in tui harsatna namen lo an tawh chu Integrated Rural Water Supply Scheme kaltlanga sutkian sak tura hmalak an tum tur thu Pu Choudhury chuan a hrilh a ni.

Multi-Disciplinary High Power Team hotupa Pu S.N. Brohmo Choudhury leh Dy. Secretary Pu Prahlad Rai ten Reiek Tourist Complex hmun an fangkual nghal bawk a, Tourism lamah pawh Mizoram chu beiseina sang tak an nei thu an sawilang a. Tukin zing Chief Minister Pu Lal Thanhawla’n tukthuan a kilpuina hunah Chief Minister nupui Pi Lal Riliani’n Team member zawng zawngte chu ngaihhruina thilpek a hlan theuh a ni.

 

 

 

{mospagebreak}