4711/2025-2026

Dated Serchhip, the 5th March, 2026: Prime Minister School for Rising India (PM SHRI) tlawha zin Central Nodal Officer (CNO-PM SHRI) Pu Lalchhandama, Joint Secretary, Ministry of Rural Development, Govt.of India leh a thawhpui te chuan zanin khan Serchhip an thleng a. DC Pu Paul L Khuma hoin District thuneitute nen DC Bangla ah meeting an nei.

Mizoram chhunga Govt Primary School 1182 awm zingah 31 chu Central Sawrkar hmalakna Prime Minister School for Rising India (PM SHRI) ah thun an ni a. Serchhip District chhungah chuan Khawlailung leh Buangpui Primary School te chu kum kalta June thla atang khan PM SHRI school ah hlan kai an ni.  Prime Minister hoa thla tin meeting pawimawh Pragati Meeting thu rel kal zelah sawrkar laipuia Joint Secretary 100 chuang te chu India ram puma PM SHRI School te tlawh chhuak tur leh, an dinhmun endik tura ruat an ni a. Pu Lalchhandama, Joint Secretary, Ministry of Rural Development, Govt.of India chu Mizoram tlawh tura ruat niin Serchhip District chhunga Mizoram Govt Primary School 2 - Khawlailung leh Buangpui Primary School te bakah Central School - Jawahar Navodaya Vidyalaya, Thenzawl, te chu vawiin khan a tlawh a ni.

Pu Lalchhandama chuan PM SHRI school te hi sawrkar laipuiin a ngaihven hle a, endik hna pawh uluk leh ngawrh takin a thawk dawn, tih sawiin Education Department te mai bakah District thuneitute chu theihtawpa tang turin a fuih a.  Sawrkar leh private school dangte tana entawntlak - model ni turin thawktuten an chawikan a tul dawn a ni, a ti.

JNV School Thenzawl hi kum 2 chhung PM SHRI an nih tawh avangin hmalakna thui tak an kalpui tawh a. Primary School pahnih Buangpui leh Khawlailung te hi chu June 2025 a thun an ni a, tun thlengin fund an la dawn loh avangin hmalakna thui tak hmuh tur a la awm rih lo a ni.

Central Nodal Officer (CNO-PM SHRI) Pu Lalchhandama hi Pu Malsawmtluanga Jt.Secretary, School Education Department;  Pu Andrew Lalrintluanga Dy. State Project Director, Samagra Shiksha, Mizoram leh Serchhip District Official ten an tawiawm a ni.