4710/2025-2026

Kolasib, 5th March, 2026: Vawiin chawhnu khan DC Conference Hall, Kolasib-ah Bawrhsap Pu Robert C. Lalhmangaiha kaihhruaina hnuaiah District Task Force on Immunization leh District TB Forum te chu an thukhawm. He thutkhawmnaah hian HPV Vaccination Campaign (Chhul hmawr cancer hri danna) leh TB dona kawnga hmalak tawhnate thlirho niin, hmalak zel dan tur presentation pek leh sawiho a ni.

Thutkhawm kaihruaitu Kolasib Bawrhsap chuan Health Department-te chungah lawmthu sawiin, presentation-a tarlan atangin an hmalaknate chu fakawm a tih thu a sawi a. Target-te an tum anga an hlen chhuah theih lohna chhan pawh thawktute inthlahdah vang emaw tan lak tawk loh vang ni lovin, chhan tha tak tak a awm hlawm vang a ni, a ti. Health Department hmalakna hrang hrangte chu tha taka thlawp a, thawhpui a pawimawh thu a sawi bawk.

Bawrhsap chuan Kolasib District chhunga target achieve lohna chhan pakhatah Bru Community leh Internally Displaced People (IDP) te an awm chu pawi a tih thu sawiin, heng mite tan hian hei ai nasa zawka tan lak a ngai a ni, a ti a. Immunization leh hriselna kawnga sawrkar hmalakna hrim hrimah mi zawng zawng an tel vek theih nan mahni zawn theuhvah tan kan lak a ngai takzet a ni, a ti.

Thutkhawmnaah hian HPV Vaccination Campaign (Chhul hmawr cancer laka invenna) chungchang sawiho niin, Kolasib District huam chhungah target 916 an awm thu tarlan a ni. February ni 28 khan Kolasib District huam chhunga Urban PHC leh PHC hrang hrangah kum 14 tling tawh, kum 15 la tling lo hmeichhe naupang mi 131 te hnenah he vaccine hi pek an nih thu tarlan a ni a. HPV Vaccine hi target atanga a chanve chu Kolasib District-in an hlen chhuah tawh thu tarlan a ni bawk.

He thutkhawmah hian TB Mukt Bharat Abhiyan Phase-II kalpui dan tur pawh sawiho a ni a. Handheld X-Ray khawl hmanga TB vei rinhlelhte chu an khuaa kalchilha test vek tura ruahman a ni. Kolasib leh Vairengte-ah chauh TB diagnose-na hmun a awm avanga harsatna awm thinte sutkian dan tur chungchang sawiho a ni bawk.

Kolasib District huam chhungah hian TB natna vei an awm em tih hriat nan screening kalpui reng a ni a, kum 2025 chhung khan mi 12,085 zet screen an ni. Vawiin thutkhawmnaah hian March ni 24-a World TB Day hman tur denchhena kum 2025 chhunga 'TB Free Village' puante hnenah lawmman hlan an nih tur thu tarlan a ni. Vawiin vek khan Nikshay Mitra (TB natna veite ei leh in tura tanpuina) Rs. 700/- per month chu Bawrhsap leh DEO-ten an thehlut nghal a. Thutkhawmna ah hian Nikshay Mitra chu Class-I Officer chin chuan tih ngei nise tiin, a tam thei ang bera puanzar nise tih a ni.

Vawiin thutkhawmnaah hian District Task Force on Immunization leh District TB Forum member-te an tel a ni.