4709/2025-2026

Lawngtlai, the 5th March, 2026 : Vawiin chawhnu dar 1:30 pm khan DC's Office Chamber ah Lawngtlai Bawrhsap Pu Donny Lalruatsanga kaihhruaina in a vawi khatna atan District Registering Authority (DRA) - Clinical Establishment Act (CEA) chungchang ah thutkhawmna neih a ni.

Bawhsap Pu Donny Lalruatsanga chuan member kalkhawmte hnenah lawmthu a sawi a. Sawrkar laipui dan siam, The Clinical Establishments (Registration and Regulation) Act, 2010 beh chhanin Mizorama clinical establishment-te chhinchhiah, khuahkhirh leh vil zuina tur, The Mizoram Clinical Establishments (Registration and Regulation) Rules, 2014 chu Mizoramah hman a ni a. He dan hnuaiah hian damdawi in, clinic leh laboratory te chu DRA-ah an inziah luh (register) vek a, a him chin leh pawm theih chin (minimum standard) an phak ngei ngei a ṭul a. Chuti ang tur chuan Lawngtlai District-ah pawh hma lak chhoh zel ani ang a ti.

Dr. Lalmuanawma Jongte, Lawngtlai District Chief Medical Officer, chuan CEA thil tun chu ram puma damlo enkawlna hmun awm zat chhinchhiah a, tehfung mumal tak hmanga inenkawlna hmun him,rintlak leh belhchian dawl ni tura buatsaih leh an nih leh nih loh enfiah na tur anih thu te a sawi.

Dr.Rosalyn Sanghmingliani, District Level Coordinator, CEA, Lawngtlai chuan CEA hi mipui te an him zawk nan a pawimawh zia sawiin, mipui te pawh kan fimkhur a, CEA registration ti ngei, CEA certificate tar ngei Clinic leh Laboratory chauh pan nachang kan hriat a tul hle ani ati.

Meeting ah hian Clinical Establishment Act hnuaia in register theih dan te leh dan lo a ti te hrem theih dante sawi ho ani a. District Registering Authority in Permanent Registration dil thei chin te leh pek theih dan te sawiin, objection nei te tana complaints theihna hun pe in, objection a awm loh chuan inspection nei a endik hnuah, pek tlak ni a hriatte chu pek thin an nih tur thu an sawi. Vawiin meeting chuan dt.16/3/2026 ah inspection neih nise tiin a rel bawk a ni.

Lawngtlai District CMO Office-in an chhinchhiah danin, tun dinhmunah Lawngtlai District chhungah sawrkar hnuai ah- District Hospital -1, Primary Health Centre - 6, Community Health Clinic Centre -1 leh Community Health Centre 1 awm in, Non- Government ah- Kohhran Hospital - 2, Diagnostic Laboratories -9, Clinics - 8 leh Dental Clinics -3 a awm a ni. Lawngtlai District a Diagnostic Laboratories te hian Permanent Registration an dil mek a,kum-5 ralhma a renew zel tur a ni. Lawngtlai District a Clinics ho hi Provisional Registration nei vek an ni a, kum-1 ralhma a renew zel tur a ni bawk. Registration hi CMO & Convener, District Registering Authority, Lawngtlai District, Lawngtlai hnena dil tur a ni.

Vawiin thutkhawm ah hian District Registering Authority member te an tel kim hle a, Bawrhsap chuan lawmthu sawiin thutkhawm a ti tawp a ni.