Central Para Military Force ah Mizote tan hmun a awm. Indo Tibetan Border Police Force hnuaia Constable tur lak chungchangah Mizoram Larsap chuan August thla tir khan Union Home Minister hnenah lehkha thawnin thil awmdan a zawt fiah nghal a. Union Home Minister Pu Chidambaram chuan he thu hi ngai pawimawh hle in Larsap hnenah hian thil awmdan a rawn sawi fiah nghal nghe nghe a ni.
ITBP Constable lak tur hmun ruak hi a tlem em avangin Mizoram tan bik zuah hran a awm lova. DAVP in advertisement a tihchhuah te chu Mizoram ah pawh tarlan ve tho a ni. He tih lai hian Central Para Military Force hnuaiah Constable hna ruak Mizoram tan bik kumin 2010 - 2011 chhung hian 449 lai a awm thu Union Home Minister hian a tarlang a. Hei bakah Mizo tlangvalte chu lehkha thiam kawngah te pianphung len zawng ah te tunhnai ah ngaihhnathiam an nih dan te sawiin hetiang anga an tlinna hmun ah te chuan duhsak taka lak zel pawh tum a ni Pu Chidamdaram chuan a ti bawk. Tun hnai mai ah pawh khan Assam Rifles leh Central Industrial Security Force te pawhin Mizo tlangval 86 lai a la fel tawh nghe nghe a ni.
