NLUP Apex Board Meeting vawi 6-na chu vawiin khan Secretariat Conference Hall-ah Pu Lal Thanhawla, NLUP Apex Board Chairman leh Chief Minister ni bawk kaihhruaina hnuaiah neih a ni a. He meeting hi Central sorkar pawhin a ngaih pawimawh avangin Planning Commission atangin Dr.J.S.Samra, CEO Rainfed Area Authority of India pawh a rawn tel nghe nghe a ni.

Chairman Pu Lal Thanhawla chuan meeting kamkeuna leh a khuh hawnna thu pawimawh chi hrang hrang a sawi hnuah he meeting-ah hian NLUP chungchang thu pawimawh tak tak bakah field level-a thawh dan tur te chipchiar taka rel leh sawiho a ni a, chung zinga ngaihtuah langsar zual te chu :-

1.     NLUP Line Department-te kaltlanga a dawngtu (beneficiaries) tur te chanpual zat tur leh NLUP dawngtu ten eizawnna ngialnghet leh tlo an neihna tura Department thuam chakna tur (infrastructure) atana sum ruahman dan tur

2.     Kum 2010-2011 chhunga hmalakna tur chhungkua (beneficiaries) zat tur

3.     Kumin atan beneficiary 19480 tura ruat chhin kha 45139-ah tihpun

4.     Kum 2010-2011 chhunga NLUP dawngtu turte hnenah tanpuina sum chu an trade/activities thlan dana zira pek zat tur leh siam rem ngai la awm thei trade/activities-ah te Planning Commission-a siam rem leh tura dil te

5.     NLUP beneficiaries te tana chhinchhiahna (Smart Card) neih te

6.     District Level-a chak taka hma la ber tur district level officer-te Motor leisak te, NLUP beneficiaries te thlai tharchhuah lei leh hralh dan tur (marketing plan) te bakah eizawnna ngialnghet an neih theih nana Department hrang hrangte thuamchak dan tur chipchiar taka sawiho a ni.