CENTRAL YMA LEH I&PR DEPARTMENT TANGKAWP MEDIA WORKSHOP 17th MAY, 2012 A PU R.L. RINDIKA, ASSISTANT SECRETARY, CYMA THUSAWI

He workshop-a thusawi tura ruat ka nih thu CYMA Literature sub-committee Secretary Pu R. Lalbiakthanga’n min hrilh a ka rilru a lo lut hmasa ber chu kum 25 liam ta a, kan Branch YMA chanchinbu ‘Bungkawn Tlangau’ ka chhut tlauh tlauh hunlai min ti hre chhuak a. Nia khatih hunlai kha Branch YMA in kartin chanchinbu kan chhuah tantirh lam kha a ni a. Portable Type-writer in stencil-ah kan chhu a, kan chhutsual chuan ‘correcting fluid’ hmangin kan hnawihsen niau nuai mai thin a ni. Chanchinbu phek hmalam tur chanchinbu hming kha a ziak thiam deuh copy 1 a Rs.l ang vel chawi khan kan ziah tir mai thin a. A tlangpuiin Zirtawp zanah kan buatsaih thin a. stencil hi tihchhiat/tihthler palh chuan a bul atang hlak a tan that leh angai ta thin a. Tihsual chang chuan men rei a awl duh thin khawp mai.

Inrinni zing alo ni a, lehkha her thiam ‘cyclo - printer’ hnenah kan kalpui leh a hetah pawh hian an khawl alo thatloh palh a stencil an tihchhiat vaih chuan buaithlak duh rem rem tak ani!! Chanchinbu hi phek khat chauh a chhuak anih lai kha chuan a ziaawm viau a, phek 2 anih hnu phei kha chuan Staple Machine-a kilh leh vek angai a, alo buaithlak thei khawp mai.

Hma kan sawn a, computer leh printer te alo chhuak a, type-writer hman lai ai chuan a ziaawm hret a, stencil tihchhiat palh pawhin angai ang chiah chiah a ‘Print’ leh kha a harsa ta lo a. Tunah phei chuan computer-a kan chhut luh tawhsa kha ‘Pendrive’ in kan la a, offset ah nalh leh felfai takin kan lo ti thei ta anih hi!! Chanchinbu enkawltu tan pawh ziaawm tak a ni ta.

Khalam kha chu lo duh tawk phawt ila. Hei vawiin ah media workshop I&PR Department te nen a tangrualin CYMA chuan an buatsaih leh thei hi lawmawm ka ti hle mai. Chawhnu lamah kimchang zawkin paper-te chu kan la ngaithla tho ang a. Amaherawhchu, mahni Branch/Veng chhung theuh a a tak tak a chanchinbu khawihtute hnenah hian han chah ve duh thil tlem ka nei ve che u a ni.

1. Official Organ : Kan chanchinbu enkawl theuh hi a tlangpuiah chuan Branch YMA Official Organ anih hmel hlawm a. Chubakah chuan kan chanchinbu enkawl ho hi newspaper ang ni lovin House Journal ani tih kan hriat reng a tha awm e. Branch YMA Official Organ anih avang tak hian YMA kalphung leh nihphung zawng zawng hi kan zirchian a kan hriat chian ve angai hle. Tin, chubakah chuan Branch YMA chanchinbu anih avangin Branch Executive emaw Branch YMA hruaitute thu leh hla kan ngaihchan thiam a tha awm e.

2. Editorial Board dinhmun : Chanchinbu enkawl hi thil hautak tak anih vangin leh hlawh neilo-a thawh ‘Voluntary Works’ anih miau avangin kum 2 or 1 bak enkawl hi chu a harsa tlangpui niin alang. Chuvang tak chuan Workshop emaw Seminar emaw kan neih fo hi chu kan mamawh thin reng a. Hetiang ang workshop min buatsaihsaktu I & PR Department chungah pawh lawmthu ka sawi nghal ani.

Editorial Board a kan tel anih chuan hengte hi kan hriat nawn fo a tha awm e.

(a) Veng chhung mi leh sa hriatchian : YMA lamah kan la inhmang vak lo ani thei, lehkha te kan lo thiam a, computer kan lo thiam bawk si, Branch hruaituten chanchinbu enkawl turin min han sawm ve tawp a, kan enkawl chu ani ve ta mai a. Amaherawhchu, kan chanchinbu chhuah ah veng chhung mi leh sa kan hriatchian ve hle loh chuan mi hming leh pa hmingte a dik lo a lo chhuah palh te hi a pawi em em a ni. Chuvang chuan, kan veng chhung a chengte kan hriat chian angai hae in ka hria. Entirnan - Naupang result HSLC/HSSLC result a chhuak a hmaih palh kan neih hlauh chuan a kar leh a chhuah angai ta a, kan hmaih palh naupang chang ni lo, an nu leh pa te thleng in an rilru kan tina in kan hliam thei a ni.

Tin, veng chhung mi hriat chian bakah hian mahni veng area chin kan chian viau a tha bawk in ka hria a ni.

(b) Edit chungchang : Branch hruaitu ten chanchinbu enkawl tura min ruat tak si ah chuan chanchinbu-a chhuah tur lo lut ang angte anihna anga chhuah tawp mai lo deuh a, a tul anga kan Edit ngam mai hi a tha lawm ni aw ka ti.

(c) A tha lam chhuah tam : Veng chhung a mi hlawhtling leh entawn tlak tam tak kan neih ang te hi pho lan nan hmang thin ta ila. Entirnan - eizawnna kawnga mi hlawhtling te, veng chhunga kan officer neih corruption-a fihlim te, zirna kawnga mi hlawhtling thar te, veng chhung a mi tlawmngai ang chi te.

(d) Pawimawh dan thliar thiam : Veng chhung chanchinbu anih bakah YMA Official Organ a ni bawk si, tah tak chuan kan thuchhuah tur hi engnge pawimawh ber anG hetiang deuh hian:
(1) Branch YMA chungchang.
(2) Veng chhung chanchin.
(3) Central YMA leh Sub-Head Quarters chungchang.
(4) Kohhran leh Tlawmngai pawl dangte.
(5) Kumpuan chungchang.

(e) Inkah chungchang : Mizo te kan changkang tulh tulh a, fiamthu pawh a sang chho ta khawp mai!!! Branch YMA chanchinbu thenkhat ah hian ‘inkahna column’ siam ani thin a. Veng dang tan chuan kan inkahna thin tam ber ah hian nuih ve chu a har deuh thin. Tin, chanchinbu kal tlanga ‘Na’ deuh deuh a inkah hi kan va kah a te huat zui theih tur ang chi hi chu tih tam loh a tha khawp mai. Amaherawhchu, a hlimawm zawng leh a nuihzat thlak zawng ang chi hi chu pawi lo ah ngai thei ila.

3. Central YMA leh HPC ‘D’ boruak : Vawiin hian Central YMA leh HPC ‘D’ boruak chungchang hi han sawi lan ve hrim hrim pawh a tha awm e.

John F. Hmar, Secretary, Information & Publicity HPC ‘D’ inti chuan ni 17th April,2012 khan Press Release siamin a thupui ah ‘Sinlung Hills Development Council hi Autonomous District ah hlankai loh ni rawh se’ tih a ni a. He Press Release hi an chhuah tuk ni 18th April, 2012 khan Central YMA Office Bearer ten Aizawl Press Club atangin a copy lak ani a. He Press Release ah hian ni 30 Jan, 2012 zanah Central YMA President chuan Ramhlun Sport Complex Branch YMA kumpuan hawnna ah he thu ‘Sinlung Hills Development Council hi Autonomous District ah hlankai loh ni rawh se’ tiin a sawi a, he CYMA tawngkam/thusawi hi mobile phone ah record a niin tunah pawh ngaihthlak theih a la ni reng tiin.

Tichuan he Press Release ah hian CYMA in Mizo dik takah min pawm lo hi lungawi theih loh tih entir nan leh Mizoram Sawrkar in fahrah enkawl a min enkawl reng hi kan duh lo tih entir nan Demand Area a YMA Branch awm zawng zawng tihluihna in kan dissolve a, tun thla chhung ngei a, CYMA kut a an seal te submit turin kan hriattir e. He order zah lova function zui zel an awm anih chuan an chungah eng thil pawh thleng se HPC ‘D’ in mawh a phur lovang tih kan puang nghal bawk e tiin.

He Press Release chungchangah hian Ramhlun Sport Complex Branch YMA hruaitute biak an niin CYMA President hian hetiang thu hi a sawi reng em tih zawh an ni a. Ramhlun Sport Complex Branch YMA hruaitute chuan hetiang ang a sawi kan hre lo tiin min chhang a. Tin, Ramhlun Sport Complex Branch YMA Executive ni 20.4.2012 zana thukhawm in CYMA President in hetiang ang thu a sawi loh thu leh ni 30.l.2012 zan hian YMA function an neih loh thu leh kumpuan chu ni 26.1.2012 zana an hawn thu chu ni 21st April,2012 khan Press Release hmangin an puang chhuak nghe nghe a ni.
Hemi chungchang ah hian CYMA pawhin hma la in kan Vice President ho in HPC ‘D’ inti te hi biak pawh tum a ni a. Amaherawhchu, HPC ‘D’ inti te hi biak pawh theih an ni lova, amaherawhchu a be pawp thei te kal tlangin mobile phone a CYMA President thusawi erawh dil a ni.

Hetiang anih mek lai hian CYMA President chu H. Sangbera, Chairman HPC ‘D’ inti te chuan Open Letter na tak a rawn thawn leh in. President thusawi loh pui kha an sawi tir leh a ni.

Hetiang anga HPC ‘D’ inti ten kan CYMA President thusawi miah loh sawi anga an puh leh kan Branch YMA te an thiat ta mai hi CYMA chuan vanduai thlak a ti a ni. Central YMA Executive Committee Emergency Meeting pawhin Central YMA thuchhuah hial a siam phah ve ta a ni.

Tin, HPC ‘D’ inti te hian HPC Demand pawn ami Branch YMA te Vairengte, N.E.Khawdungsei, Chiahpui te pawh bang turin an hriattir leh zel te hi Central YMA chuan vanduai thlak ati tak zet a ni. CYMA Executive Committee ni 12th May,2012 a thukhawm chuan tunlai kan boruak in hrilhfiah tur hian Sub-Head Quarters hruaitute leh HPC ‘D’ inti ten bang tura an tih Group leh Branch aiawhte chu ni 24th May,2012 hian neih turin alo ruahmanna alo siam ta hial ani.

A tawp ber ah chuan, Central YMA hian Mizo hnam tlemte leh Mizoram zimte thendarh zawnga hnambil leh chibing inla hrang zawnga thil tih te, ram leh hnam inpumkhatna tichhe thei zawng a hmlakna reng reng chu a dodal zel dawn ani tih ka sawi nawn leh duh ani. Chuvang chuan, tuna HPC ‘D’ inti te pawh hi tuna an thil tih hi bansan a inlam let turin ka ngen duh bawk a ni. YMA chuan Mizo Hnahthlak Mizo a inngai zawng zawng chu Mizo ah a pawm vek a ni tih hi ka sawi nawn leh duh bawk a ni.

YMA vul zel rawh se. Ka lawm e