No.2497/2021-2022

Aizawl the 6th October 2021: Vawiin chawhma khan Pu P.Jawahar, IAS, Chief Electoral Officer, Mizoram chuan 4-Tuirial (ST) AC Bye Election kalpuina tur a Lungdai, Serkhan, Hortoki, Kawnpui leh Thingdawla Polling Station-te a endik a, Kolasiba Counting Hall leh Strong Room buatsaih dan te a hmunah a endik nghal bawk a ni.

Pu P.Jawahar, IAS, CEO chuan DC Conference Hall-ah Political Party hrang hrang leh NGO aiawhte bakah Election Official-te kawmin Bru voter, Tripura-a letleh ta, Mizorama Electoral Roll a la chuangte chu Roll atanga paih vek an nih theih nan Mizoram chhunga Political Party leh NGO hrang hrang atanga ngaihdan lakkhawmte nen ECI-ah thlen a nih tawh thu a sawi.

CEO chuan hrileng kar a inthlanna kalpui tur a nih angin Candidate-te chu Covid-19 vaccine (Full dose) la an ni lo a nih chuan RT-PCR test negative an nih a tul thu a sawi a. Vote thlak tur te hnenah kutkawr sem tur a nih thu leh vote thlak ni a darkar hnuhnung ber, dar 5 PM leh dar 6 PM inkar chu hri kaite vote thlak hun atan a ruahman tur a nih thu a sawi bawk a ni. Covid-19 positive vote thlak tur an awmin Polling Station-a duty zawng zawngten PPE hak vek tur a ni dawn a ni.

Pu P.Jawahar, CEO chuan ECI phut angin Candidate zingah thubuai nei tawh an awm a nih chuan, Candidate tur a tihchian an nih atanga darkar 48 chhungin tlangzarh tur a nih thu a sawi bawk a ni.

He hunah hian Pu Thomas D.Lalengliana, President, Sub Headquarters YMA, Kolasib chuan Polling Station pangai ni lova, a bik a Special Polling Booth ang chi a Bru-te vote thlakna tur siam anih chuan an dodal tur thu a sawi a, Political Party hrang hrang aiawha lo kalte pawhin an thlawp thu an sawi ve bawk a ni.

Pu P.Jawahar, CEO hi Pu David L.Pachuau, Joint CEO-in tawiawmin, Bye Election kalpuina tur atan a invenhimna kawnga inpuahchah dan te, hrileng inkaichhawnna lak a Polling Official leh voters-te an him theih dan tur te leh Polling station inbuatsaihna kalpui dan te sawi ho a ni.