3295/2023-2024

Aizawl, the 9th January, 2024: Vawiin khan Mizoram State e-Governance Society (MSeGS) Meeting Room, Old Secretariat Building-I ah Pu Madhup Vyas, IAS, Chief Electoral Officer, Mizoram chuan Special Summary Revision of Photo Electoral Roll, 2024 kal mek chungchangah Political Party hrang hrang aiawhte meeting a neihpui.

CEO Pu Madhup Vyas chuan Political Party-te chu electoral roll dik leh felfai neih theih nana thawhpuiah a sawm a. A bikin khawpuiah hmun khat aia tamah E-Roll a hming chuang emaw, hmun danga insawn tawh, an awmna hmasa Electoral Roll-a hming la awm emaw, mitthi tawhte Electoral Roll-a la chuangin inthlanpuia vote tlak dan percentage thleng a nghawng theih avangin heng hi a awm loh nana hma lakpui turin a sawm a. Election Commission of India (ECI) duh dan angin Electoral Roll-a felfai leh felfai loh BLO te enpui turin Polling Station tinah Political Party-te chu an aiawh Booth Level Agent (BLA) ruat theuh turin a ngen bawk.

January ni 6, 2024 (Inrinni) a Draft Electoral Roll tlangzarhin a tarlan dan chuan Mizoram chhungah voter 8,52,087 awm mekin heng zinga 4,13,063 te hi mipa niin, 4,39,024 te chu hmeichhia an ni a. Kum 80 chunglam voter 11,194 leh PwD (Rualbanlo) voter 3,381 an awm mek bawk.

Special Summry Revision of Photo Electoral Roll, 2024 atana Election Commission of India (ECI) in ruahmanna a siam ang chuan January ni 6, 2024 khan Draft Electoral Roll tlangzarh niin dilna leh thlen duh neite tan hun hawn nghal a ni a, dilna hrang hrang thehluh theih hun chhung chu January ni 22, 2024 thleng hawn niin, dilna lut te hi February ni 2, 2024 hmaa ngaihtuah zawh hman tura ruat a ni a. Ruahman dan chuan Electoral Roll thar ber Final Electoral Roll chu February ni 8, 2024 ah tlangzarh tum a ni.

CEO Mizoram hi Pu James Lalnunmawia, Jt. CEO leh Election Department Official-ten an tawiawm a ni.