Vawiin chawhma dar 11.00 khan Chalfilh bial-a bye-election neih tur chungchangah District Level Standing Committee (DLSC) chuan an Chairman leh Aizawl DC ni bawk Dr. Franklin Laltinkhuma hovin a pisaah meeting an nei a ni.

He meeting-ah hian Aizawl DC chuan 23.2.2013-a Chalfilh biala by-election neih tura inpuahchahnate chipchiar takin a pharh a. Vawiin atang hian he inthlana official turte tan training buatsaih tan a nih thu a sawi. Chalfilh bial hi sector 3-ah thenin magistrate-ten an vil ang a; model code of conduct zawmdan vil turin team 4 siam a ni bawk. He inthlan hi tluang taka neih a nih theihna turin sawrkar department hrang hrangte chu an mawhphurhna theuh tha taka hlenchhuak turin Aizawl DC chuan a chah a ni.

Chalfilh bial-ah hian pollingstation 29 a awm a; heng zinga 13-te chu sensitive a puan an ni. Chung Polling Station te chu N. Khawlek, Daido, Vanbawng, N.E. Tlangnuam, Lamherh, Khawlian I, Khawlian II, Suangpuilawn I, Suangpuilawn II, Phuaibuang I, Phuaibuang II, Zawngin leh Luangpawn-te a ni.

Vawiina meeting-ah hian by-election neih turin a kaihhnawih department hrang hrang aiawhte bakah, MJA, MUP, MHIP, MPF leh party aiawhte an tel a ni.