Nimin, January 28, 2013 khan Aizawl Bawrhsap Office-ah MLA te, Pu D.S. Phanabalkar, Army Recruiting Officer te, College Principal leh an aiawh te leh mi pawimawhte thukhawmin, Mizo thalai tam zawk Armed Forces Officer-a an luh tam theih dan tur sawiho a ni.

Tuna A.R.O. thar hian Mizo thalaite nungchang zirin khaw tam tak a tlawh tawh a, thalai tam tak Army Officer-ah an tlin theih ngei a beisei thu a sawi a, Aizawla College leh 10+2 School Principal te chu an Nodal Officer tui tak ruat theuh turin a ngen a, an zirlaite hemi lama kal tam tura fuih turin a ngen a ni.

Army Officer-a luh theih dan hrang hrangte chu hetiang hi a ni:

1) Combined Defence Services Examination(CDSE): kumtin UPSC-in vawi hnih exam a conduct thin. Dil thei chu Graduate chin, kum 24 aia upa lo nih tur a ni. He exam-a tlingte chuan kum khat chhung Indian Military Academy (IMA)-a training zawhain Leautenant (Li.) zawm nghal theih a ni a, Permanent Commission Officer an ni.

2) NDA&NA: National Defence Academy & Naval Academy Exam- kumtin UPSC-in vawihnih exam a buatsaih thin. 10+2 pass, kum 17-19 inkar tan exam theih a ni. He Exam-a tlingte chu kum 3/4 chhung an training hnuah Permanent Commission Officer, Lt.-a dah an ni. Hemi chi hnih hi UPSC-in a buaipui thin an ni.

3) Short Services Commission Officer (SSCO): Hei hi Army Headquarters-a dilna thehluh thin a ni. Chi hrang tam tak a awm-

3(a) NCC ‘C’ Certificate nei tan: kumtin mi 50/60 vel lak thin a ni. Graduate chin kum 25 aia upa lo, NCC’C’ Certificate, B grade tling chin tan. Mipa leh hmeichhe tan kumtin hawn a ni thin. Heta tlingte chu OTA Chennai-ah kum khat vel training-in Lt-a dah an ni.

3(b). Graduate First Class emaw, PG-a 55% chin, kum 25 hnuai lam. Army Education Corps-a lut tur chuan Master Degree: MA,MSc,MCA etc a ngai.

4) Doctor te tan: MBBS/BDS/BVSc&AH: kum 45 thleng pawm an ni. Doctor te hi Captain-ah dah nghal an ni.

5) BSc(Nursing)te Military Nursing Service-ah Lt-ah zawm theih a ni.

6) LLB te tan Advocate General Branch-ah, kum 27 thleng pawm a ni.

7) Engineer chitin tan Technical Officer tur mamawhna a sang hle.