Vawiin khan Chief Secretary Pi L. Tochhong, IAS kaihhruaina hnuaiah Secretariat Conference Hall-ah Rural Development Department hnuaia Centrally Sponsored Schemes (CSS) hrang hrang kalpui mekte hnathawh chin thlirletna leh an harsatna tawhte sawihona neiin State Level Coordination Committee chu an thukhawm.

Meeting ah hian Plan Fund kaltlanga CSS hnuaia sum lokal dinhmun leh a hman dan chungchang te; MNREGA job card holder te tan Jivan Bima Yojana phuisui zawk kalpui dan chungchang te; CSS chak leh zawka kalpui anih theih nan a ngheta village level functionaries dah chungchang te; DRDA inrelbawlna leh a hnuaia hnathawk chungchang te; Works/Assets Register uluk zawka vawn dan chungchang te; MNREGA hnuaia Social Audit tih changtlun chungchang te chu uluk takin an sawihova. A taka hna kalpuitu DRDA leh BDO te harsatna tawh thin te pawh zau takin an sawiho bawk a ni.

He meeting-ah hian Rural Development Department Secretary Pu K. Riachho, IAS; DC Mamit; DC Saiha; Rural Development Department Director leh senior officer dangte, District hrang hranga DRDA Project Director te leh BDO engemaw zat an tel a ni.