Mizoram Governor Pu Vakkom Purushothaman chuan “Ruahmanna fel, tha leh rintlak leh changtlung kan siam thiam phawt chuan a chhawr tangkai ber tu tur te chu mipui mimir an ni” a ti. He thu hi Northeast Consultancy Services (NECS)-in an din champha vawiina Aizawl Vanapa Hall-a an hmannaa a sawi a ni a. Governor chuan kum 2007-a din NECS-in vawiin thlenga tluang taka an Company an la kalpui thei chu lawmpuina a hlan a. Mizoram-in Consultancy Services tha tak state dangte chhawr phak hial a nei chu chhuanawm tiin hei hian Mizo mipuite sumdawnna leh eizawnna lama an thiamna leh talent neih thatzia a pholang a ni, a ti. Mizo thalai mithiam tak tak te chuan Consultancy Services dang an la din zel a beisei thu a tarlang bawk. Sorkar Laipui ruahmanna angin Asia khawmualpuia ram dang te nen insumdawn tawnna zau tak buatsaih mek a ni a, hmarchhak state te tan pawh hmasawnna nasa tak a thlen dawn a ni, a ti. Project leh Scheme kan neih that poh leh hmasawnna a chak ang a, a chhawr tangkai ber tur chu mipuite zel kan ni Governor chuan a ti bawk.

NECS Chairman & Chief Managing Director Pu Robert Romawia Royte chuan NECS chanchin leh an hmalakna hrang hrang te a sawifiah a, an Company hnuaia hna thawk tha te hnenah chawimawina tangkafai an hlan a, zuk leh hmuam dona kawnga thawh hlawk tak Pi Lal Riliani, President, Indian Society on Tobacco & Health (Mizoram Chapter) hnenah TT NECS Special Citizen Award 2012 hlan a ni bawk a ni.

NECS hian mi rethei leh chanhai te chhawmdawlna a thawh thin bakah thalai te khawvel lamah pawh inhmangin tunlaia football club lar tak Aizawl Football Club (AFC) pawh hi a bultum niin hmun thum laiah Football Academy a kalpui mek bawk a ni.

Vawiin inkhawmah hian Home Minister Pu R.Lalzirliana leh Transport Minister Pu P.C.Zoramsangliana te pawh an tel ve a, lawmman hrang hrang an sem. Parliamentary Secretary pahnih Pu Lalrinmawia Ralte leh Pu K.S.Thanga te bakah MLA leh Sorkar mi pawimawh engemaw zat an tel bawk.