Ram changkang tehfung pawimawh tak pakhat chu mahni tawng ngeia lehkhabu ziak an neih tam leh tam loh hi a ni, Parliamentary Secretary Pu Lal Thanzara chuan a ti. He thu hi “Enteh Lungrun” tih lehkhabu leh music video, Lalhmachhuana Zofa ziak leh phuah vawiina Zonet Studio-a a tlangzarh tuma a sawi a ni.

Pu Lal Thanzara chuan ziak mi te hi Mizo hnam tihausatu leh hmasawnna kawnga rahbi pawimawh tuk tu an ni, a ti a. An thu ziak hian lehkha chhiar thin te, thu leh hlaa riltam te a ti tlai a, Mizo hnam tan an hlu a ni tiin vawiina lehkhabu leh music video a tlangzarh tak chu hemi kawnga rahbi pawimawh tak sial tu anih ngei a beisei thu a sawi a ni.

Thawnthu tawi 26 chuanna “Enteh Lungrun” lehkhabu leh music video tlangzarhna inkhawm hi Hnam Chhantu Pawl President Pu R Ramhmangaiha’n a kaihruai a, The Writer’s Club Asst. Secretary VLC Vanlalhriatrenga’n lehkhabu chhungthu bihchianna neiin a hmuh dan a sawi a. The Zozam Times News Editor Aitea Ralte chuan HC Sanglura sak Enteh Lungrun music video bihchianna leh a hmuhdan a sawi thung. Lehkhabu ziaktu leh music video chhawp chhuaktu Lalhmachhuana Zofa chuan lawmthu sawiin hun hnung a khar a. Thuziak lama inhmang tak Lalhmachhuana Zofa hian lehkhabu hrang hrang, Mizo thawnthu lar tak tak telin lehkhabu 49 zet a tichhuak tawh a, tichhuah hmabak hnaivai tak paruk lai a nei mek bawk.