SJSRY Cell, UD & PA Department hnuaia BPL Member, Trade hrang hranga training chhuakte Certificate hlanna hun vawiin khan CHANEM a I&PR Auditorium-ah neih a ni. Addl. DC Pu R. Zarzosanga khuallian niin training chhuakte hnenah certificate a hlan a ni.

Khuallian chuan thu sawiin mi zawng zawngin sorkar hna kan thawk thei lova, kan sumdawng vek thei hek lo. Sorkar-in mahni tuina zawng theuhva eizawnna kan neih theih nan leh chumi atana thiamna bik kan neih theih na turin training buatsaih thin a ni, a ti a, tun tum ah pawh hian thla 6 chhung training neih a ni tawh a, an thil zirah hian thiam zel zul hi a tha ber tawh lova, an kalna turah hneh takin an thiam tur a ni a ti. Training an neih zawh hian eizawnna kawngah a bul an tan dawn chauh a ni, tiin training chhuakte chu mahni intodelhna atan an training-na chu hmang tur leh midang tana tangkai taka hman tum turin a chah a ni.

Inkhawm kaihhruaitu Pu Lalenglawma Pakhuangte, District Project Officer, SJSY Cell chuan thu hma sawiin he prgoramme hi khawpui a mirethei, BPL chhungkua ten mahni a eizawnna an neih theihna tura tanpuina pek emaw, hlawh tha zawk an hmuh theihna atana an kut themthiamna lama training pek a ni a, mi pakhat training na atana senso, zirtirtu hlawh, hnathawhna bungraw man, stipend leh neuh neuh hian Rs. 10,000/- a pel tur a ni lo, a ti a, Matric pass tan standard sang deuh hlek, Technical lam ngai tel vocational training pek theih a ni a, Matric pass lo tan chuan technical lam ngai tello training bik buatsaih thin a ni a ti a, tun tumah hian trainee 109 awmin training centre 22 an nei a. Training neihna trade te chu 1) Tailoring 2) Beauty Parlour, 3) Motor Mechanic, 4) Artificial Flower Making, 5) Mobile Repairing leh 6) Computer Diploma te an ni.