Disaster Management & Rehabilitation hmalakna in Champhai-ah vawiin khan chhiatrupna thlen palha inralrin dan leh mumal taka chetlak dan tur inzirtirna hmun thumah buatsaih a ni. Champhai YMA Sub. Headquarters Conference Hall-ah Sub. Hq. hnuaia Branch YMA hrang hrangte tan ‘Community Awareness Programme on Disaster Management’ buatsaih a ni a. Hemi rual hian Department aiawh leh vantlang hruaitute tan GM Higher Secondary School-ah Incident Respose System (IRS) leh India Disaster Resource Network (IDRN) chungchang inzirtirna buatsaih a ni a. GM Higher Secondary School-ah vek hian zirna in a thawkte tan ‘School Safety Training’ buatsaih a ni bawk.

‘Community Awareness Programme’ inzirtirna hun hi Champhai DC charge la mektu Pu Zoengsanga chuan hmanpuiin, khuarel chhiatna leh mihringina kan insiam chawp chhiatna lo thleng thin laka kan him theihna turin kan fimkhur hle a ngaih thu a sawi a. In kan sak danah pawh sum neih vang ringawta insak ringawt te, a remchanglai apianga in kan sak thin avangin, mahni tan mangkhawng kan insiam fo thin a ni, a ti a. Chhiatna lo thlen thulhah kan him tlan zawk theihna turin mipuite pawhin chiai leh luhlul chhuah lovin thuneitute thuawih kan zir a ngai a ni, Pu Zoengsanga chuan a ti.

Workshop on IRS and IDRN neihna ah hian Pu Lalhmunsanga Hnamte, Joint Director, DM&R chuan Mizoramah hian lirnghing nasa tak a lo thleng dawn em tih chu kan zawhna nilovin, a lo thlen hunah engtin nge kan inralrin ang tih a ni zawk tur a ni, a ti a. Chutihrual chuan heng khuarel chhiatna duhawm lo tak tak kan sawi fo thin hi kan insawithaihna nilovin, a lo thlen taka chiai lova kan awm theih nan leh, fimkhur kan zir theih nan a hmalakna ni, a ti.

Vawiiin training hmun thuma neihah hian chhimtute anmahni hna chelh zawn theuhva an mawhphurhna tur zirtirna pek an ni a. ‘Community Awareness Programme’ hnuaiah hian chhanchhuah hna thawh dan te, hospital thlen hmaa hliam tuarte sawngbawl dan te ngaihthlak a ni a. ‘School Safety Training’-ah hian zirtirtute chu Pu Lalnunmawia, Principal, Govt. Champhai College kaihhruaiin chhiatrupna laka school leh a chhehvel venhim dan te leh naupangte tana mock drill buatsaih dan te ngaithlak a ni a. ‘Workshop on IRS and IDRN’, Pu Benjamin Lalzama, SDO (Sadar) kaihhruaiah hian IDRN chungchang leh IRS hnuaia Department tinte mawhphurhna ngaihthlak a ni bawk.

Vawiin workshop buatsaih hi naktukah Mock Drill-in a chhunzawm ang.