Sorkar Laipuiin mipuite hmasawnna tura ruahmanna hrang hrang a siam inhrilhhriatna hun ‘Public Information Campaign/Jan Soochna Abhiyan’ chu nimin khan Mualthuam ‘N’ Community Hall-ah tan a ni a. He PIC hi Lunglei District atan ni 3 chhung hman tur a ni a, vawiin a Ni 2-naah Lunglei Deputy Commissioner Pu Ashish Madhaorao More chu Khuallian a ni.

Vawiin Public Information Campaign Ni 2-na hawnna inkhawm DIPRO Lunglei Pi Mina Zoliani kaihhruaiah Khuallian Lunglei DC Pu Ashish More chuan PIB huaihawtin Lunglei District chhungah mipuiten sorkar scheme hrang hrang an hmelhriatna tur leh hrilhfiahna hun buatsaih a nih thei chu a lawmawm hle a ni, a ti a. Lunglei khawpui pawna awm thingtlang khuaa cheng leh kuthnathawktute zingah zawk he hun hi hman a nih chu duhthusam a ni, a ti bawk. Ram leh mipuite hmasawnna tura Sorkar Laipui ruahmanna thar pawimawh tak tak heng - PMJDY, Digital India, Make in India, Swacch Bharat, SAGY, etc. te hi mipuite hamthatna tura siam a nih ang takin heng scheme-te hi mipuiten an hriatchian a, an hman tangkai dan tur pawh hrilhhriat a pawimawh em em a, chu chu PIC tum ber pawh a ni, a ti. Lunglei District chhunga heng scheme kalpui mek sorkar department hrang hranga hnathawkte chu taimakna leh rinawmna nen theihtawp chhuah zel turin a chah a. Sorkar ruahmanna te hlawhtling tak tak tur chuan mi zawng zawng kan tanrual a tul avangin mipuite pawhin sorkar hmalaknaah phur tak leh tha taka thlawp zel turin a chah a ni. Hawnna inkhawm zawhah Khuallian Pu Ashish More hian DAVP buatsaih Exhibition chu a hmunah a fang nghal bawk a ni.

PIC Core Committee Chairman, Pu Mangjangam Touthang pawhin thusawiin Mizoram hmun hrang hrang PIC hi kalpui mek a nih thu a sawi a, District tinah an Deputy Commissioner-te chu sawm zel niin an district chhunga mipuite nena hun hman ho hi Sorkar Laipui pawhin a ngai pawimawh a ni, a ti a. Sorkar ruahmanna tam takte hlawhchhamna chhan lian ber chu mipuiten sorkar ruahmanna an hriatthiam tawk loh thin vang a ni tih hriain sorkar pawhin PIC hmanga mipuite hrilhhriat zel a tum ta a. Kum 2006-ah ‘Bharat Nirman Campaign’ tia vuah a ni a, kumin 2014 atang hian ‘Public Information Campaign/Jan Soochna Abhiyan’ tiin thlak a ni ta a ni, a ti.

Vawiin PIC Ni 2-naah hian Mualthuam Comunity Hall-ah kalkhawm mipuite hnenah RTI Act, Digital India, SAGY, MNERGA, Health scheme hrang hrang bakah scheme kalpui mek a dangte chungchang zirtirna pek a ni a, zawhna leh chhanna hun hman zui nghal a ni. Zingkarah Ramlaitui-ah Public Rally neih a ni a, zirlai naung bakah khaw mipuite he rally-ah an tel tha hle a ni.

Ni 3 chhung awh Public Information Campaign neih mekah hian Mualthuam ‘N’, Ramlaitui leh Kanghmun ‘S’ ah te Health Camp huaihawt a ni a, hengahte hian MSACS bultumin HIV/AIDS chungchang inzirtirna neih a ni nghal bawk a ni.

Nimin 26.11.2014 PIC hawnna inkhawm ni hmasa ber Mualthuam ‘N’ Community Hall tho-a neihah Lunglei West bialtu MLA Pu Chalrosanga Ralte chu Khuallian a ni a. Pu Chalrosanga chuan Lunglei District tan PIC neih a ni thei chu lawmawm a tih thu leh PIC chu corruption dona hmanrua pawimawh tak a ni tiin PIC hlawhtling taka neih a nih theih nan duhsakna a hlan a ni.