Higher Secondary School naupangte tana English Language Teaching Institute (ELTI) SCERT in a buatsaih ‘On the spot writing competition’ leh Class X leh Class XII Board Exam 2014 a English subject a mark hmu sang top three te tan ‘Proficiency Award in English’ semna hun nimin ni 27.11.2014 a SCERT Auditorium a neih chu Pu H. Rohluna, School Education Minister leh Pu Joseph Lalhimpuia, Parliamentary Secretary ten an hmanpui a Dr. Venkat Reddy Associate Proffessor English & Foreign Languages University, Hyderabad, Co-ordinator, ELTI Support Scheme ni bawk chuan he programme hi a rawn hmanpui bawk a ni.
SCERT in zirlaite tiphur zawnga hma an lakna ah fakin khuallian Education Minister Pu H. Rohluna chuan lawmthu sawiin Saptawng chauh pawh ni lo Science leh Mathematics a tithate lawmman pawh sem a lo nih tawh thu a sawi a. Engtik ah mah english tawng pawimawhna hi a kiam dawn lo va, thiam a ngai a ni tiin khuallian chuan english medium lama kan tlan nasatzia leh school pawh a tam thu sawiin zirna quality erawh a inang lovin class hniam lam atana zirna uluk a ngaih thu a sawi a. A+ emaw ‘O’ emaw an hmuh avanga lawm ringawt lovin kan faten an thiam tak tak em tih hriat a ngai a, quality a ngai a ni a ti. Sawrkar sikul pawh bul tan that leh a ngaih thu leh kawng tam tak ah siksawi ngai a awm nual thu pawh sawiin khawvel thang chho zelah naupangte rilru umphak ve zel a ngaih avangin tan la zel turin nu leh pa te Minister chuan a ngen a. ‘Survival of the fittest’ a thei leh thiam apiangte din channa khawvel a nih tawh avangin tan la sauh sauh turin zirlai kalkhawmte Education Minister chuan a fuih a, lawmman la hnenah lawmpuina a hlan bawk a ni.
Khual zahawm Pu Joseph Lalhimpuia pawhin thu sawiin SCERT a thawkte chu Mizotawng leh sap tawng zirtirtu tha tak an nihna ah a fak a. Tun laia film lehlin atanga tawngkam mawi lo, naupang leh thangthar in tawng mawi lo leh tha lo a ni tih pawh hre lova tawng tualleng ah an hmang thin chu pawi a tih thu sawiin thangtharte tawng dik zirtirna tur kawnga tan lak a ngaihzia uar taka sawiin radio leh TV leh remchang awm ang ang tawng dik inzirtir nana hman a tul thu a sawi a, chutih rualin taksa hriselna ‘physical fitness’ pawh a pawimawh a ni tiin faina leh thianghlimna kawnga beihpui thlak a nih tur thu a sawi bawk.
SCERT (State Council of Educational Research and Training) hi 20th January, 1980 khan din tan a niin 22nd May, 2008 khan Directorate of Schoool Education atanga in dangin naupangte hmasawnna atan rahbi tam tak a chher chho tawh a. ‘On the spot poetry writing competition’ a tel tur hian Aizawl chhunga Higher Secondary School hrang hrang 13 te tun tum ah hian an in el a ni. Zirlai naupangte zirna kawngah nasa takin kawngro a su tih hriat a nih avangin hetiang in elna hi buasaih a ni a. Lawmman pawh tha tak siam a ni. Pu Venkat Reddy pawhin he hunah hian thu sawiin saptawng pawimawh leh eizawnna a saptawng tel lova hna hmuh a harsat dan te a sawi bawk.
He programme kaihruaitu Pi Malsawmthangi, Director, SCERT chuan Poetry Writing Festival leh Proficiency Award buatsaih a nih dan a sawi a. He programme hi kum 2011 atang khan kum tin buatsaih thin a ni in tun thleng hian zirlai 137 hnenah Proficiency Award hi hlan a nih tawh thu leh kumin ‘Poetry Writing Festival’ ah hian Higher Secondary School pakua (9) atangin zirlai 49 in poem tha tak tak ziak in inelna an neih dan te a sawi. Poetry inelna a lawmman dawngtute chu : Pakhatna : Joe Lallawmpuia, St. Paul Higher Secondary School. Pahnihna : Lalremruata Sailo, Helen Lowry, Higher Secondary School. Pathumna : K. Lalrinfela, MICE.
Proficiency Award in English hi HSLC Exam 2014 a English a titha Top three zirlai 28 hnenah hlan a ni a. HSSLC Exam 2014 a English titha zirlai 11 hnenah hlan a ni bawk.
