Vawiin khan Champhai ah Cleanliness Week 2016 khar na inkhawm neih a ni.

Kharna inkhawm, Govt Champhai College Multipurpose Hall-a hmanah hian Champhai DC Pu Vanlalngaihsaka chuan thu sawiin, Faina hapta chu khar mah ila, faina chu kumtluana kan nunpui tur, kan nitin nuna bet tel tlat a ni tur a ni, a ti a, Champhai District chu Mizoram District zingah a fai ber ni turin hma a la mek a. Tunah hian India rama hill state zingah District fai 9-na a ni a, hmasawn zel tur chuan a chhunga cheng mipuite kan pawimawh hle a ni, tih sawiin, pawna inthiar awm lohna, Open Defecation Free-ah Champhai District chu puan a ni thei dawn tawh a. Rural area chuan endik an ngam thu State level-ah September ni 28 khan thawn tawhin, Urban area pawh ODF-ah hian a hmahruai atan an inpuang tawh a ni, a ti a, hemi kawnga hmalatu SE, PHED; Project Director, DRDA leh DUDO, UD&PA te hnenah lawmthu a sawi a ni.

Thusawitu dang Pu Lalnunmawia, Govt Champhai College Principal chuan fai kawngah hmasawnna tur kan la ngah hle a. Kan chhehvel tihfai chauh a tawk lova, kan taksa kan tifai tur a ni, a ti a, zuk leh hmuam chu faina kawnga min daltu lian tak a nih avangin kan hnualsuat a hun tawh hle a ni, tiin a sawi.

He hunah hian Faina Hapta neih chhunga intihsiakna hrang hrang result puan niin lawmman sem nghal a ni a. Veng fai berah Zotlang thlan a ni a, Vengthlang North leh Tlangsam te chuan pahnihna leh Pathumna an hauh a. Sorkar pisa fai berah Sub Divisional Education Office thlan niin DRDA leh EE, PHE Dept office ten an dawt a ni.

High School-ah Govt Bethel High School chu pakhatna niin Govt Vengsang High School leh Bethel Mission school ten pahnihna leh pathumna an hauh a. Middle School-ah Govt Kanan M/S chu pakhatna an ni a, Govt Vengthlang M/S chu pahnihna niin PES, Vengthlang chu pathumna an ni. Primary School-ah Govt P/S VI, Bethel veng chu pakhatna an ni a, pahnihnaah Govt PS Vengthar awmin Govt PS Zote chuan pathumna an hauh bawk. Hei bakah hian sms competition leh primary school tana drawing competition-a lawmman dawngtute hnenah lawmman pek an ni a. Faina kawnga hmala tha leh entawn tlak Pu NC Langa, Kahrawt; Pi Hausangpuii, Zotlang leh Pu Chawngkhuma, New Champhai te hnenah chawimawina thuziak hlan a ni bawk.

Pi V.Lalmuanpuii, District Urban Development Officer chuan lawmthu sawiin he hun hi a khar a ni.