Tun lai LPG (Gas) harsatna awm chungchang ah Food, Civil Supplies & Consumer Affairs Department chuan a hnuaia mi ang hian mipui te hriat atan thu a chhuah.
LPG ( Gas) lama harsatna awm chhan bulpui ber chu Gas phur Transporter-te vang a ni a. Hun rei tak Gas Cylinder-te hi transporter ten an lo ti chingpen thin tawh a. Hei hi Supply Deptt. leh Central YMA te chuan tha a tih loh avangin July ni 4, 2016 atang khan tangdun in, Distribution point-ah Branch YMA/LC/VC te an buk tir ta a. Transporter-te hian tender-an chhan in, Gas tihchingpen chhut tel ranin, a hniam lamin an chhang thin a. Hetia Distribution Point-a Cylinder-buk a nih hnu chuan transporter-te hi ahma a an hlawk angin an hlawk thei tawh lova. Hei vang hian kawhmawh chi hrang hrang an bawl ta a ni. A hma a thla tin Cylinder 1,20,000 vel dawng thin kha, July thla atang kha chuan thla tin 90,000 vel chiah dawn a ni ta a, Cylinder-chu a khat tha tawh thung.
Sawrkar hmalakna hrang hrang te :
Chief Minister in lehkha Pahnih (2) a ziak a. IOC, Chairman hnenah transporter-ten harsatna an siam sak hrang hrang hrilh in, chinfel sak tur a hriattir in IOC ten Distributor te dahbelh sak turin a ngen bawk. Union Minister for Petroleum-hnenah IOC chauh lo pawh BPCL, HPCL leh private Gas distributors te pawh rawn in hawng turin ngenna a thlen bawk a ni.
Secretary, Supply Department pawh Guwahati ah zin thla in, ni 4 October khan IOC Executive Director leh Chief Manager LPG te hnenah Mizoram harsatna a zuk thlen a. Uluk deuh a an sawi ho hnu chuan hetiang hian IOC hotute chuan Mizoram puih an in huam.
(a) Distributor- te hi transporter te angin, IOC te hian anmahni a Gas in phurh an phalsak dawn a ni.
Transporter-te hi delayed movement/poor performance avangin Show Cause Notice an pe tawh.
Mipui te hnena ngenna :
Gas Cylinder lakna ber Mualkhang leh Borkhola ah chuan Cylinder khat hi a tam lutuk. Transportation hi tuna buai na ber chu a ni. Tuna harsatna hi thil dik duh vang a ni a. Kum engemawzat transporter-te’n Gas an lo khawih thin vang a ni a, chumi duhloh vang chuan Cylinder te hi bukzel an ni a. Hemi kawnga hmalak puitu CYMA/Branch YMA/LC/VC chungah pawh Sawrkar a lawm hle a ni. Cylinder buk avangin transporter-te hian kawhmawh an bawl a. Transporter lian pathum (3) te hi non-mizo an ni. He harsatna hi rei pawh a nih hmel tawh lo a, chuvangin mipui te lo tuar hram hram tura ngen an ni, chu chuan khua rei ah that pui na a thlen ngei beisei a ni bawk.
