Vawiin chawhnu khan DC conference Hall ah Faina Hapta 2016 kharna inkhawm buatsaih a ni a, SDO Sadar Pu Vanrengpuia, MCS chu khuallian niin Hapta hman chhunga faina lama inelna lawmman te a sem nghal.

Hapta kharna inkhawm Pu Lalrinthanga Sailo, President, Serchhip Joint Village Council kaihhruaiah khuallian chuan, Serchhip hi khaw fai tak, faina lama mi nawlpuite an thanharhna khua nia a hriat thu leh lawmawm a tih thu a sawi a, chutihlaiin a kum tela kan bawlhhlawhte a pun ve ze avang leh faina chu damchhunga kan nunpui tur a nih si avangin tan leh zual sauh sauh turin a ngen bawk. Faina Hapta chu faina lama kan intuai tharna hun reilote a ni mai a, a taka faina kalpui erawh chu engtiklai pawha kan tih tur a ni, a ti. Pu Vanrengpuia hian Hapta chhunga inelna hrang hranga lawmman la te hnenah lawmman a sem nghal bawk a, lawmman dawngtute chu hetiang hi an ni:

Veng/VC Area fai inelnaah hia Chhiahtlang chuan lawmman pakhatna lain Serchhip Village Council 1 chu pahnihna an ni a, Village Council 8 chu pathumna an ni. Zirna in fai inelnaah Government Chhiahtlang Primary School 3 chu pakhatna niin New Serchhip Secondary School chu pahnihna an ni a, Little Flower Convent School chu pathumna an ni. Office fai inelnaah Soil & Water Conservation Office chu pakhatna niin PWD Office chu pahnihna an ni a, District Court chuan pathumna lawmmna an dawng a ni.

Hapta kharna inkhawmah hian Pu K. Laldinthara, Head Circle Assistant, DLAO chuan faina lama Serchhip khawpui chhunga sawrkar hmalak dan hrang hrang te report a pe a. Serchhip ah hian kum 2003 atangin Faina Hapta hi hman tan niin vawiin thlengin tluang takin la hman chhoh zel a ni a. Hetianga hmalakna neih a nih atang hian hmuh theihin Serchhip hian hma a sawn nasa hle a ni. Tunah hian Bawlhhlawh paih na tur motor (Sanitary Truck) pahnih awmin nitin Serchhip khaw chhunga veng hrang hrang te a tlawh kual a, Chhiahtlang khua, SAGY Village in a hran Sanitary Truck a dawn tak atangin Chhiahtlang erawh chu a tlawh ta lo thung. Heti chung hian Veng a tam avang leh khua a zau tham avangin chawlhkar khat danah chauh Sanitary Truck te hian veng an tlawh nawn hman a ni.