Vawiin chawhmaah khan Chanmari YMA Hall-ah Parliamentary Secretary Pu Joseph Lalhimpuia hovin 6th State Level Science Drama Competition State Council of Educational Research and Training (SCERT) in buatsaih chu neih a ni.

Pu Joseph Lalhimpuia chuan Hnam changkang, hmasawn, fing leh upa apiangin Drama leh Theatre an ngai pawimawh a ni, a ti a. Drama chu mihring nun chhoh dan chhinchhiahna leh historical document pawimawh tak a ni a, ‘ Science and Society’ behchhana lemchan intihsiakna chuan Mizo khawtlang nun atan a zirtirna pawimawh tak a chhawpchhuak a ni a ti.Science leh Mathematics lama Mizoram in hma a sawn theih nan Sawrkar hmalakna in Science leh Mathematics zirtirna Doordarshan Kendra, Cable TV leh Internet kaltlangin chhawpchhuah a nih tur thu a sawi a. TV leh internet kaltlanga zirtirna chuan Science leh Mathematics Teacher nei mumal lo zirlaite tan hmasawnna a thlen ngei a beisei thu a sawi a ni.

Vawiina neih tak, Science Drama Competition, 2016-ah hian Govt.Mamawii High School chuan pakhatna an hauh a; anni hian North East Zone intihsiakna, Guwahati-a neih turah 21st October, 2016 khian Mizoram ai an awh dawn a. North East Zone-a titha ber pahnih zinga an tel phei chuan National Level Competition ah an tel zui leh dawn a ni.

Attachment

  • Loading attachment...