Tukin zing dar 7:00 khan Pu Zoengsanga Addl. DC Champhai chuan CHANEM building tualah Faina Hapta a hawng.

Faina Hapta hawnna inkhawm hi Pi V. Lalmuanpuii, District Urban Devekopment Officer in a kaihruaia, hawnna thu sawiin Pu Zoengsanga chuan Faina hi kan nitin nuna nunpui a tul a ni a ti a. Mizoramah vawi tam tak Faina hapta kan hmang tawh a, Fai in zirtir fo pawh hi a zahthlak tawh hial zawk a, mitinin in zirtir ngai tawh lova kan nunpui a hun tawh zawk a ni a ti.

A sawi zelnaah Pu Zoengsanga chuan Champhai chu khaw vannei tak, hmun danga miten an tlawh chak a ni a, mi ten an tlawh chak lehzualna turleh kan hip tam zawkna turin Faina kawngah hmalak zual sauh sauh tul a tih thu sawiin vawiin atangin India Hnampa Mahatma Gandhi piancham denchhenin India ram pumpui faina tura beihpui thlakna, Swachh Bharat Abyian chu Prime Minister-in a hawng dawn a, Champhai District tan pawh hawn nghal a ni a ti.

He hunah hian Pu K.Zohmingliana, EE (PHED) chuan India ram pumpui Faina tura beihpui thlakna Swachh Bharat Abhyian thu ken, Faina Thutiam chu kalkhawmte a lak tir nghal a, hemi hnu hian School hrang hrang atanga Scout & Guides ten khawlai thenfai hnatlang nei nghalin, heng hnatlang te hi Khuallian in a vai liam (Flag Off) a ni.