Vawiin Mahatma Gandhi piancham vawi 150 na zing dar 7:00AM hian Lawngtlai khawpui laili Areopagy ah faina hapta hawnna inkhawm leh National Sanitation Campaign (Swacch Bharat Abhiyan) hawnna inkhawm a ruala hman a ni a, Deputy Commissioner Pu J. Hmingthanmawia chu khuallian a ni.

Kum 2014 faina hapta, 2nd – 8th October Lawngtlai District a a hmanna pui ber inkhawm a khuallian Pu J. Hmingthanmawia chuan Lawngtlai District chhung ah Malaria hri vei hmuhchhuah a tam hle a, chutiang bawkin natna dang dang te pawh a tam hle a ni. Heng tlanghrileng leh natna te awlsam taka kan kai nachhan pakhat chu kan chenna in leh a vel kan tih fai tawk loh vangte a ni thin a, faina leh hriselna hi thil inzawm tlat an nih avangin kan hrisela kan lo chak zawk theih nan faina hi kan uar a ngai takzet a ni, a ti. Ram changkang kan ngaihsan em em ho te pawh hi an chhungril nun te, midangte tana an inpekna te zuk hre vek lo mah ila an lan danah an fai a an thianghlim tlat avangin an changkangin an ngaihsan awm a ni tih kan hre thei thin, an ni ang bawk hian keini pawh hi faiin thianghlim ila ram leh hman changkang tak kan lo ni thuai dawn tihna a ni tiin kalkhawmte a fuih bawk.

Sawrkar laipui programme thar Swacch Bharat Abhiyan (National Sanitation Campaign) Lawngtlai District a hawnna hun pawh khuallian hian a nei nghal a ni.

Tukina a hawnna inkhawm ah hian zirlai naupang, tlawmngaipawl, VC leh Sawrkar hnathawk thahnem tak an kal a, hun hman zawh ah kalkhawmte hi inthendarh in khawchhung thenfai hnatlang an nei nghal a ni.

Faina hapta chhung hian Lawngtlai khawchhunga zirna in, Office leh Veng tin te inelna buatsaih a ni a, a khar ni 8th October ah lawmman semna neih a ni ang.