Tukin dar 7:00 khan PHE Complex, Kolasib-ah Deputy Commissioner Pu Jitender Yadav-a hovin Swacch Bharat Abhyan (Clean India Mission) chu hman tan a ni.

Kolasib DC Pu Jitender Yadav chuan, "Mizoram mipuiten faina kan ngai pawimawh a, abik takin Kolasib mipuite hian fai duhna thinlung kan puin, a taka nunpui nachang kan hria hi a lawmawm tak meuh a. Kum 2019 thlenga hman tur hi Clean India beihpui thlakna pawh hi a tihlawhtling tura mi zawng zawngin kan tha leh zung te kan sen a, kan rilruah fai duhna kan tuh theuh chuan a rah kan seng ngei ang" a ti. Mahatma Gandhi-an, 'Mi tin hi mahni bawlhhlawh thianfaitu nih theuh tur' a tih chu rilrua vawng reng turin mipuite a chah a ni.

Er. F.Sanglura, EE, PHED, Kolasib pawhin fai leh hriselna lama invawn thianghlim pawimawhzia thupuia hmangin thuchah a sawi a. "Tui thianghlim tlan tur hnianghnara neih te, zun leh ek thlahdah loh te, bawlhhlawh a hmun taka paih leh tihral te, kan rilru puthmang leh khawsak dan thlak danglam te hi hriselna atan a pawimawh a. PHE department chuan ek in neilote tan ek in siamsak hna a kalpui mek a ni" a ti.

Vawiin atanga Faina Hapta hmang tanin Kolasib khaw chhunga Veng hrang hrangten hnatlang an nei a; office, school leh Veng fai thlan chhuahte hnenah he hapta kharna inkhawmah lawmman pek an ni dawn a ni.

Vawiina mipui kalkhawmte hian faina vawngtu leh mite zirtirtu ni a, nitin darkar 2 tal faina atana hun leh tha seng turin thutiam an sawi rual bawk a ni.