Vawiin chawhma dar 07:00 khan Serchhip Bazar hmunah LAD leh UD&PA department te bultumin Faina hapta 2014 chu hawn a ni a, hemi rual hian faina ngai pawimawh em emtu, India Hnam Pa Mahatma Gandhi-a piancham vawi 150-na, kum 2019 a lo thlen huna India ram chu khawvela ram fai an sawite zinga a tel ve ngei theihna tura Central Sawrkar hmalakna; Clean India Campaign (Swachh Bharat Abhiyan) hawnna neih nghal a ni.

District Bawrhsap Pi Juhi Mukherjee IAS chuan he Faina Hapta leh Clean India beihpui thlakna hun hi a hawng a, thu sawiin mipuite chu faina ngai pawimawh tur leh thu chauha vei lova a taka thawk chhuak turin a sawm a ni.

Pi Juhi chuan Pu Gandhi-a zirtirna te sawi langin, a hun lai chuan faina chu mi rethei leh hnuai hnungte tih tawka ngaih a nih thin a, mahse Pu Gandhi-a chuan mitin mawhphurhna a nih thu leh fai chu zalenna aia pawimawh hmasa zawk a nih hial thu a zirtir thin a ni tiin kan in leh a vel te, kan office leh zirna inte, vantlang hmunte hi tun ai hian vawng fai lehzual ang u tiin mipuite a sawm a. Mizote chu kohhran leh tlawmngai pawlte atanga inkaihhruaina fel tak nei kan nih avangin faina chungchangah pawh kan ziaawm viau a, mahse kan vantlang hmun, a bik takin kan khelmual leh sumdawnna hmunpui lamah bawlhhlawh hmuh tur a la tam deuh nia a hriat thu sawiin helamah pawh hian tan la thar lehzual ang u a ti bawk.

Bawrhsap chuan sawrkarin faina a ngaihpawimawh em a vangin MLA leh MP te pawhin an Development Fund te pawh vantlang faina atan an hmang nasa hle a ni tiin faina hi khawpuiah leh thingtlangah a pawimawh vek a, chumi atana thawk tur chuan mi lian leh mi te kan awm chuang lova, khua leh tui zawng zawng te mawhphurhna a ni tih i hre thar leh theuh ang u tiin kalkhawmte a sawm a ni.

He hun hi Serchhip Town Joint Village Council President Pu B. Vanlalsawma’n a kaihruai a, District Local Administration Officer Pu S.T. Lalhmingmawia chuan report pein kuminah Branch YMA fai te, Zirna in fai te leh Village Council Area fai te thlan a nih tur thu te a sawi a; tin Pu Lalrosiama SDO (TC) PHE kaihhruainain Swachh Bharat Abhiyan (Clean India Campaign) atana thutiam chhamrualna hun hman a ni bawk.

He inkhawmah hian sawrkar officialte an kal tha thawkhat viau a, Scout and Guides te, NCC te leh Branch YMA hrang hrangte sawm a ni bawk a, inkhawm zawh a nih hnu hian kalkhawm te chuan Serchhip bazar leh hmun pawimawh dang te an thian fai chhunzawm nghal a ni.