MLPC dan siam mek chu nakum ah hman a nih tur thu Home Minister Pu R.Lalzirliana chuan nimin October 1 khan Tualbung khua ah 'khawvel pum huap Upa te Ni' denchhen a MUP member te pual programme a hmanpui na ah a sawi a. MLPC dan hnuaiah pawh zu chhia, nunna tam tak suattu hi nasa zawka khap a ni dawn a, zu tellova khawsa thei lo te tan erawh chuan Sawrkarin zu thianghlim zawrh a phal dawn a ni a ti a. Kan dan siam hian min ti chhe viau dawn a nih phawt chuan siam chawp a nih angin siam that dan emaw tihtawp hial dan pawh a awm thei ang a ti.

Maxi Cab, Taxi leh lirthei dangte chetsualna ah hian a tamzawk ah driver-te zuruih vang a ni thin a ; a lo ziawm chhohnan leh lirthei chesual a tlem zawk nan zurui chunga lirthei khalh ching te hrem na dan a khauh anga, han incheck deuh thut pawh a zing deuh dawn avangin motor khalhtu te chu fimkhur turin a chah a. Excise mi leh sa-ten thawk/thaw enfiahna khawl changkang an hmang ang a ti . Vantlang hmun leh khawlai, kawtthler a zurui buaina siam ching tan hmun a awm theih loh tur thu a sawia. Zu hi duh zah zah leh duh hun huna lei theih a ni dawn lova, smart card hman a ni anga chu chuan kar khat emaw nikhat chhunga mipakhat tana zu leitheih zat a hril ang a ti. Home Minister chuan tuna zu la tem chhin lo: khawtlang leh kohhran a inhmangte leh ruihtheih thil a fihlim te chu smart card siam ve duhlo ngam turin a ngen a, MLPC dan hian mipui te zu in turin a sawm lova zu nghei theilo zu chhe in mekte nunna chhan nan leh an nunkhua a lo sei deuhnan sawrkar in hma a la mai zawk a ni a ti. Puipunna hmun leh thuziakna huang thenkhat ah thudik thawi in thu awmze neilo hmanga zu chung changa mipuite fuihpawrh leh bawl tum an awm hi thil pawi tak a ni a ti a ni.

Home Minister Pu R.Lalzirliana chuan state plan sum dinhmun pawh sawi tel nghalin sum hman tur a awm lawk lohna chhan leh inrenchem taka sawrkar in ke a pen chhan chu sawrkar laipui in state tinte sum dawn tur chhutchhuaktu Planning Commission a thiah vang a nih thu a sawi a. Rei tak chhung chu Mizoram in budget a neih len theihdan tur pian hmang leh sum dawn zah tur pawh a hriat theih loh thu a sawi a.Tunah chuan Mizoram in Central atanga sum dawn ve zat tur riruang pawh a hriat theih tan tawh a, NLUP kalpui zel nan cheng vaibelchhe 300 hman phalna pawh central atangin kan hmu tawh a ni a ti. NLUP tanpuina dawngtute vulh tur Vawk note leh bawng note te pawh ngaihtuah mek a nih thu a sawi a.

Upate puala programme buatsaih ah hian Tualbung MUP,MHIP leh YMA te chuan an khawchhuak Pu R.Lalzirliana, Home Minister chu an chhuan thu hrilh in chawimawina an hlana, ram tana theihtawp chhuaha hnathawk zel turin an chah a ni. Home Minister hian ama sumfai Rs.50,000/- Tualbung khawchhunga tuikhur siamna turin a pe a, MUP hmantur thingpuino leh thildangte pawh khawtlang hruaitute hnenah a pe bawk a ni.