Nimin (9.6.2017) khan champhai District park Hringlang tlangah Green Mizoram Day chu Champhai Bawrhsap Pu Vanlalngaihsaka IAS hoa hman a ni.

Khuallian chuan ramngaw tangkaina leh humhalh a tul zia sawiin, "thing leh mau te hi boruak tha oxygen siamtu leh boruak chhia carbon dioxide hip raltu an ni a,  mithiamte chhut danin thingbuk tha pangai kum 50 vela upa hian mihring 200 hip khawp boruak tha oxygen a pe chhuaka,  heti anih chuan khawvelin a buaipui em em global warming do nan thingphun uar a tul hle a ni" a ti. Ramngaw pawimah zia sawiin lei hnuaia ruahtui khawl khawma a hun takah a remchan dan anga mihringte leh ran te  hman atan a pe chhuak thin tiin,  thingphun leh enkawl chu uar deuh deuh a tul thu a tarlang a ni. Mithiamte zirna atangin Lei chunglang inch 18 vel chu khawvel agriculture ingnghahna a nih thu sawiin lei chunglang tha inch 1 a chhah siam turin kum 50-100 a ngai a,  he lei chunglang thatak tui hawka luangral tur venghim tu chu ramngaw a nih thu a sawi bawk a, school leh damdawi in compound a thing buk tha tak awm hian zirlai leh damlo tan hmasawnna a nih tih an hmu chhuah thu a tarlang bawk a ni.  Mizoram ah pawh mihring kan pung zela,  hma pawh kan sawn zela chutih laiin ramngaw lah a chereu telh telh a,  tun hma zawng aiin khua a lum bakah thing leh mau lak tur a vang telh telh a. Hengte a vanga mizoram sawrkar in NLUP leh Mass tree Plantation program - green mizoram day a lo duang chhuaka - hei hi mitin in tawiawm a, thingphun leh enkawl uar deuh deuh turin kalkhawm mipuite chu a sawm a ni.

Green mizoram Day ah hian nikum lama ramngaw humhalh tha lawmman semna neih a, ni. He hunah hian champhai District a sawrkar department hrang hrang,  zirlai naupang pawl hrang hrang leh mualkawi branch yma ten  thing tiak 6000 chu District Park Hringlang tlangah an phun a ni.