Nimin tlai khan Chief Minister Pu Lal Thanhawla'n National Council of Churches in India (NCCI) in June ni 5 atanga tan a ni 5 chhunga (June 5-10) Mipa leh Hmechhia te intluktlanna chungchang leh a kaihhnawiha Certificate Course on Gender Studies, Synod Conference Centre ah an buatsaih chu a kharna programme a hmanpui a, Certificate Course hlawhtling taka zo Kohhran rawngbawltu leh member 20 vel hnenah Certificate an hlan a bawk a ni.

Chief Minister Pu Lal Thanhawla chuan India rama hmeichhia te dinhmun leh an chan ngaihtuahin hmeichhia te chawikanna kawngah thawh tur leh tih tur a la tam thu a sawi a. Ramchhung hmun tam taka vawiin ni thlengin hmeichhia te chu an pian tirh atanga hna an thawh hnu thleng pawha bungrua ang mai an nih tih ngaihdan vanduaithlak a awm nia a hriat thu a sawi a. Mizorama Kristianna a thlen hma chuan Mizo hmeichhia te dinhmun pawh a that loh thusawiin Kristian kan nih hnu chuan hei hi nasa takin a intlak a, vawiinah chuan Mizo society ah hmeichhia te an nih avanga enhranna a awm tawh lo niin ka hria a, mahse chuti chungin an dinhmun siamthatna kawnga tih tur a la awm niin ka hria a ni, a ti. Hmeichhia te dinhmun chawikanna atana The Mizoram Marriage, Divorce and Inheritance Rules te pawh siam an nih tih a sawi bawk.

Ramchhung hmun hrang hranga hmeichhiate chunga hleilenna rapthlak tak tak thleng thinin rilru a tih hrehawm thusawiin dan leh hria chungchang inzirtirna leh inhrilhzauna lam legal awareness program angte buatsaih tam a tul leh a ngaih thu a sawi lang a. Hmeichhia te chunga hleihlenna hrang hrang thleng thin immoral trackking lam thlengin Mizorama hriattur a awm tawh a, nu te hian a bik takin an fate an venghim nan entik lai pawha an fimkhur a tul nia a hriat thu a sawi a. NCCI in hmeichhia te dinhmun leh intluktlanna atana thil pawimawh leh a tul te zirtirna an buatsaih chu an fakawm a tih thu a sawi bawk.  

Programme ah hian Sr. Executive Secretary, Mizoram Synod leh Moderator Elect. Rev. Lalramliana Pachuau; Pi K. Lalliantluangi, Chairperson, Presbyterian Womens' Fellowship, Mizoram Synod leh Pi Moumita Biswas, NCCI, Ex-Secretary te pawhin thu an sawi a ni.

Certificate Course a tel te hi Mizoram bakah Hmarchhak state hrang hrang leh Orissa leh West Bengal Kohhran hrang hrang rawngbawltu leh member te an ni.