Nimin chawhma dar 11 khan NLUP leh RKVY Convergence Scheme hnuaiah Tuikum Cluster-a Sapthei chingtu chhungkaw 444 te hnenah NLUP 2^nd instalment sem  ani a, Pu P.C. Zoramsangliana, MLA, MIFCO Chairman chuan khuallian niin he hun hi a hmanpui.

Khuallian chuan tanpuina dawngtute chu a lawmpui tak zet ani a ti a, kuthnathawktuten eizawnna atana an thlan hmalakna tur bul tannaa hun a hman pui thei chu lawmawm a tih thu a sawi bawk. Mizoram sawrkarin Green Mizoram Day a hman ni taka tanpuina dawngtute pawhin Green Mizoram Day hmalakna tihlawhtling tura hma la ve nghal tura chahin, tlangram lo neih bansan a, kum tin lo hal pumpelh tura an hmalaknaah theih tawp chhuah turin a fuih a ni.

Sapthei chin thlangtute chu an awmna hmun theuhah khawtlang nuam leh awhawm tak siamtu an ni thei tih hriain, Pathian hriatpuia a thlawna tanpuina an dawn chu a hmanna tur dik taka hmang turin leh an hlawhtlinna atanga Pathian hnena pek let ve nachang hre reng turin a chah a. Mihring taksa tichhe thei leh hrehawmna nasa tak min tuar tirtu, sum leh pai tam tak min khawhral tirtu zuk leh hmuam hi bansan nachang kan hriat a tul tawh hle ani a ti bawk.

He NLUP leh RKVY Cenvergence Scheme hnuaiah hian Sapthei chingtute hnenah cheng nuai khat leh sing hnih theuh sem tura ruahman a ni a. A tirah chuan Sapthei chingtu thlanchhuah chhungkaw 601 hnenah tanpuina hi installment-in pek a ni a, pawisa fai mai bakah, a khur laihna te, a zamna siam nan te, tui lakna leh a thlawhfaina senso turte pek phawt a ni a. Hemi hnu hian a zamna tur thirzai pek leh an ni bawk. Village Level NLUP Monitoring Tema ten uluk taka an endik hnuah hna thawk thalo leh chhunzawm tlaklo chhungkaw 176 chu paihin tunah hian chhungkaw 444 hnenah tanpuina hi pek chhunzawm an ni ta a ni. Sapthei chinga eizawngtute zingah sawrkar hmalakna pawimawh tak mai NLUP chu zaa 70 velin a hlawhtling ni a hriat a ni bawk.

Tuikum Cluster hnuaia Sapthei chingtute leh a lei saktu MIFCO te hian an thar chhuah zawng zawngte leisak turin inremna an siam a. He  hmalakna atang hian nikum hmasa (2015-16) atang khan Sapthei hi an lei sak tan a, a man pawh an pe nghal a ni. MIFCO in nikum 2016-17 chhung a Sapthei an lei zawng zawng quintal 1736.79 atangin quintal726.59 zet chu Tuikum cluster hnuaia Sapthei thar chhuah a ni a, Sapthei thartute hian a tir lamah chuan Bazar lamah man man zawkin an hralh tlangpui a, a rah a lo tam chinah MIFCO hnenah hian ahlawm lian zawkin a n hralh thin a ni.

He hun hi Pu J. Hmingthanmawia, Managing Director, MIFCO-in a kaihruaia, tanpuina pawisa fai Rs. 35000 chu Khuallian Pu P.C. Zoramsangliana chuan mi 22 te hnenah hlanin, a bak chhungkaw 424 te chu an bank accountah an dah sak a ni. Pu H. Lalrochama, Dy. Manager (Tech) chuan lawmthu sawiin he hun a khar a ni.