Vawiin chawhma khan Loch Hall, 46 Assam Riffles ah Assam Riffles Ex- Servicemen, Mizoram chuan rally, 2017 an hmanga. He hun hi Mizoram Governor Lt.Gen Nirbhay Sharma, (Retd.) chuan khuallian niin a hmanpui.

Governor chuan Mizoram chhunga Ex-Servicemen te chu an inthlung tha a tih thu a sawi a. Mizoram hmun hrang hrang a fankual tawh atanga a hmuhdan chuan  khawtinah ex-servicemen te mi zahawm leh entawn tlak vek nia a hmuh thu a tarlang a. An thatlai hunte India ram venhimna atan hmang tawh mahse ram leh hnam hmelma ruihlo chi hrang hrang, HIV leh thil thalo thildang do kawngah te pawh sawrkar, tlawmngai pawl te leh vantlang pui chhunzawm zel turin a chah a ni. 

Mizoram Governor Lt.Gen Nirbhay Sharma, (Retd.) chuan Assam Riffles chu India sipai zinga upa pawl a nih thu leh India tan indona mual hrang hrangah huaisen taka an lo fehchhuah thin tawh thu a sawi a. An hnathawh ropui tak avang hian sawrkar pawh a lawm em em a. An hamthatna tur kawng hrang pawh Ministry of Home Affairs in a siam belh mek zel a ni a ti a. Ex- Servicemen te chuan an hna chawlhsan tawh mahse faina kawngah te, mahni inthunun kawngah te leh taihmakna kawngah te midang te tan entawntur ni chhunzawm zel se. Tawngdang a bikin Hindi zirtirna kawngah phei chuan mawhphurhna pawimawh tak an nei a ni a ti.

Assam Riffles Ex- Servicemen Rally ah hian Ex-Servicemen te tan a man neilova doctor rawn theihna hun te leh an harsatna hrang hrang awlsam taka chinfel theihna tur hmun te hawn a ni a. Rally puala inkhawmna hun Loch Hall-a buatsaih hi Brig. MS.Mokha, DIG, Assam Riffles in a kaihruai a. He hunah hian sipai huaisen fam tawh te aiawhin an nupui te hnenah lawmman sem a ni a. Subedar Major Thangzika, President, Assam Riffles Ex- Servicemen, Mizoram in Rally an neihchhan te a tarlang a ni