India zalen sualchhuahna ni Independence Day vawi 69-na chu vawiin khan Champhai District-a lawmna pui Chhangphut Field-ah chuan urhsun takin hman a ni a. He huna Khuallian Finance Minister Pu Lalsawta chuan Hnam Puanzar pawtparhin, parade contingent 25-te Hnam Puanzar chibai bukna a chhanglet a; Independence Day thuchah a sawi hnu ah parade contingent 25-te Hnam Puanzar chibai bukna a chhanlet hnu ah parade intihsiakna a tithate hnenah leh National Awardee pahnih hnenah lawmpuina a hlan bawk.

Khuallian Finance Minister chuan Champhai District chu Burma ramri dep a awm a nih avangin hma lam thlirna tura hmun pawimawh tak luahtu a nih thu leh, Sorkarin a ngaihpawimawh thu a sawi a. Mizoramah chu Sorkar, Kohhran leh Tlawmngai pawl hrang hrangte lungrual taka an thawhhona te; India rama ziak leh chhiar thiam kawnga state titha ber te zing a mi leh mi hausa - mi rethei inthliarna awm lohna anih vang te; sik leh sa boruak nuam leh ruahtui tha tak dawng thin ram anih avangte leh; hnam dinchhuah chak, midang nih ang chu nih ve theih ngei tum rilru pu kan nih avang ten Mizoram chu "ram changkang, ram hausa, ram thlakhlelhawm, tu leh fate tana chenna tlak ram nuam siam turin Mizo fate hian chhuanlam engmah siam lova kan tan a ngaih thu Minister chuan a sawi.

Minister chuan kan tu leh fate leh Sorkar lo la awm zel turte tana phurrit an rawn rochun loh nana Sorkarin theihtawp chhuaha inremchemna leh sum lakluh belhna (Additional Resource Mobilisation) atan damdawi kha ei a ngaih thu sawiin, 'dam hlenna tura doctor-in min zaina kan tuar chhuak ngam ang hian ram leh hman dam khaw chhuahna tur atan chuan vawiina nung damte hian tuar a tul chuan tuar kan huam a ni," a ti a. State rorelna kawnga Sorkar hmalakna leh hlawhtlinna hrang hrang Minister chuan tarlangin, ram rorelnaa thuneihna insemzai chungchangah khawpui ber chu Municipality kuta dah a nih hnuah tunah Aizawl Municipal Corporation pawhin kum nga hmel a hmuh tawh thu te; Hmeichhiate dinhmun chawikang turin Village/ Local leh Municipal Council-ah te hmeichhia te tan hmun hauh bik a nih thu te leh; mak chhiat emaw roluah ve theilo a kawng hrang hranga hmeichhiate chhan na tura "The Mizo Marriage , Divorce and Inheritance of Property Act, 2014" siam a nih tak thu te; hlemhletna tibo tura Anti-Corruption Bureau leh Lok Ayukta din a nih thu te; NLUP hmalakna rah tha tuna kan hmuh tan mek thu leh thawh hmasak a la tello te tan tunah Sorkarin hma a lak mek thu te; ram hmasawnna atan Sorkar te mahse Sorkar remhria nei turin hma lak mek a nih thu leh, NEC leh DoNER ten hna lian tam tak an thawh thu te a sawi a.

Independence Day denchhen hian Champhai District chhunga tun hnaia National Awardee-te chawimawina neih tel a ni a. A nunna thap a thiante tuitla a chhanchhuah avanga huaisen lawmman - Jeevan Raksha Padak Award, 2014 dawngtu Remlalhruaitluangi (kum 9) D/o Vanlalthanga, Hruaikawn hnenah leh, Champhai District-a Bharat Scouts & Guides movement atanga Rashtrapati Award dawng hmasa ber tur Chingkhannuami, D/o Thangchinpauva, GM Higher Secondary School zirlai hnenah Khuallian chuan lawmpuina a hlan a ni.  

Vawiin Independence Day parade-a contingent 25 zingah hian Unarmed Contingent 5 , School Contingent 19 leh Vengthlang Middle School Scouts & Guides Pipe Band an tel a. Parade entir zingah hian school contingent-te atangin titha pathum thlanchhuah niin, BC English Academy School Girls Contingent chu pakhatna a puan an ni a, Bethel Mission School Boys Contingent chu pahnihna niin, pathumna chu Govt. Champhai Higher Secondary School Girls' Contingent an ni.

Independence Day lawmna Chhangphut Field-a neih zawh hian Independence Day Chief Guest hovin official leh mi sawm bikte tan DC Bungalow-ah At Home function neih a ni a. Chawhnu lamah Independence Day Football Tournament Final khelh chhunzawm a ni. He Football Tournament ah hian First Division team pariat intum in, final match hi Vengsang leh Zotlang Sporting Club ten an khel a ni.