India ramin zalenna a hmuh champha phak vawi 69-na chu vawiin khan Lunglei Thuamluaia Mual-ah ropui taka lawm a ni a, FCS&CA Minister Pu John Rotluangliana chu Khuallian niin hnam puanzar a pawt pharh a ni.

Independence Day 2015 lawmna Ceremonial Parade chibai buk a chhanlet hnuah Khuallian Pu John Rotluangliana chuan thu sawiin kum kalta chhunga sorkar hmalakna leh hlawhtlinna hrang hrang a tarlang a.Dan leh thupek kenkawh leh Mizoram mipuite himna vawn that chu sorkar ngaih pawimawh ber a ni a, hemi kawngah hian Police bakah tlawmngai pawl, thuthar thehdarhtu te, kohhran leh mipuite inpekna zarah rampumah Mizoram chu state ralmuang ber nihna kan hauh thei hi a lawmawm takzet a ni, a ti. Mizoram sorkar chuan NLUP kaltlangin chhungkaw 90,139 hnenah tanpuina a pe tawh a, midang chhungkaw 44,861 te hnenah tanpuina pe turin chak takin hma a la zel bawk a ni, a ti a. Lunglei District chhungah NLUP dawng turin chhungkaw 22,251 thlan niin tanpuina sum semchhuah tawh zawng zawng chu cheng vaibelchhe 133.12 a tling tawh a. Chief Minister’s NLUP Special Scheme dawng tura thlan chhungkaw 212 hnenah tanpuina 1st installment pek vek tawh bawk a ni tih a sawi. FCS&CA Department hmalakna azarah cheng vaibelchhe 9.60 sengin Kudam thar 17 sak hna chu thawh zawh tep a nih thu te, Kudam thar 27 dang sakna tur vaibelchhe 32.68 chu NABARD atangin puk a ni a; eirawngbawlna Gas indaihlohna avanga harsatna pawhin ziahawm lam a pan mek tih a tarlang bawk. Sorkar Laipuiin thutlukna a siam angin October thla atangin Mizoram-ah pawh Food Security Scheme kalpui tan tum a nih thu leh hemi dawng tur hian 2011 Census zulzuiin mi 7,06,296 chhinchhiah an ni bawk, a ti. Food Security-in a huam tur chu thingtlangah chuan mi 81.88% nih laiin khawpuiah chuan mi 48.60% an ni thung ang.

Khuallian chuan thu a sawi zelnaah PWD chuan NEC Scheme hnuaiah cheng vaibelchhe 14.16 sengin Tlabung-Kawrpuichhuah kawngpui (16.42 km) a siam zova, hei bakah Asian Development Bank sum cheng vaibelchhe 259.20 hmangin Serchhip-Thenzawl-Buarpui kawngpui cheithatna hna leh Kaladan Multi-Modal Transit Transport hnuaiah cheng vaibelchhe 677.20 senna tur kawngpui (99.83 km) siam hna chu chak taka kalpui mek a ni bawk, a ti. Sorkar-in lirthei him zawk nan High Security Registration Plate  thlakna rate pawh August ni 1, 2015 atang khan a tihniam tawh a. Lunglei District-ah chuan motor 1386 registered tawh niin Driving Licence 3428 pekchhuah tawh a ni tih a tarlang a. Vehicle Registration leh Road Tax pawh computer hmangin tih vek a ni tan tawh a, Smart Card hmanga driving licence pekchhuah zat chu 1442 niin motor 533 registered tawh a ni bawk a, sorkar-a chhun luh tur Rs.132.91,753/- khawn tawh a ni tih Khuallian hian a tarlang bawk. 

Mizoram chhimlam kawlphetha lakluhna Serchhip (Bukpui) 132 KV Line chhe thin chu sorkar-in ngaimawhin he harsatna sukiang tur hian Project siamin 110 Km Single Circuit Transmission Line Melriat-Lunglei (Khawiva) chu September 2016-a thawh zawh tura ruahman a ni a, he hnathawh mek chu a zawh hunah chhimlamin kawlphetha lakluhna kawng 2 a nei thei dawn a. Lunglei khawpui hmar lamin kawlphetha tha zawka an hmuh theih nan KV sub-station Kawmzawl-ah siam mek a ni bawk tih Pu John Rotluangliana chuan a sawi a. Lunglei chhimlam Tawipui tlangdung ten kawlphetha hnianghnar zawka an hmuh theih nan REDB Project hnuaiah 33 KV Line Theiriat atanga Tawipui leh 33/11 KV Line Tawipui atanga Mualthuam ‘N’ chu thawh tan thuai tum a ni bawk a ti. RGGVY hnuaiah electric nei tawh khua 53 leh la nei ngai lo khua 13 hnenah electric pawh luhsak an ni a; Indo-Bangladesh border-ah pawh flood lighting siamzawh tawh a ni, a ti.

Pu John Rotluangliana chuan Zirna hi ram hmasawnna tehfung pawimawh tak pakhat a nih angin sorkar pawhin theihtawp a chhuah zel a, rampuma ziak leh chhiar thiam tamna ber state nih tumin beihpui thlak mek niin chumi atan chuan Lawngtlai, Mamit leh Lunglei District-ah uar lehzuala kalpui a ni, a ti a. Lunglei Government College-a Auditorium Annex Building sak nan Special Plan Assistance hnuaiah sum ruahman a nih thu a sawi bawk. Mipui vantlang hriselna leh inenkawlna tha ruahman turin Lunglei Civil Hospital-a Housing Complex sak nan Ministry of DoNER-ah proposal thehluh mek a nih thu te, E&F Department hnuaiah Thorangtlang Wildlife Sanctuary ram zauh chu 198 sq.km. tum a nih thu leh Lunglei District-ah ramngaw siam belhna leh ramngaw chhe tawh siam that nan ram 360 hectares-a zauvah Plantation siam a nih tur thu te, Pukpui (Lunglei) ah Ministry of Tribal Affairs atanga sum hmuh atangin Scheduled Tribe Girls’ Hostel sak mek a nih thu te a tarlang a. Lunglei HPC kaltlangin Lunglei District hmasawnna turin sorkar building leh mipuite mamawh building dang sak nan cheng nuai 70, kawng laihna leh kaihhawih atan cheng niau 118.42, Sports tih hmasawnna kawnga HPC Cup leh HPC Tennis Tournament  buatsaih nan cheng nuai 20 te hman a ni tih a sawi bawk.

Independence Day 2015 pualin Lunglei Circuit House-ah mi sawmbik te tan thingpui inhona ‘At Home’ buatsaih a ni a, he hunah hian Lunglei Photographers’ Association chuan Independence Day pualin ‘Photo Exhibition’ an huaihawt bawk a ni. Khuallian Pu John Rotluangliana hian Photo Exhibition-a thlalak phochhuahte chu enin thlalak 1 Rs. 2000/- in a leisak nghal a ni.

Vawiin Independence Day Ceremonial Parade-ah a zavaiin Contingent 22 leh Band party 2 an tel a; Parade Commander chu Lunglei SDPO Pu B.Laldingngheta niin 2nd Parade Commander chu SI B.Lalnunsanga a ni. March Past leh Independence Day puala Sports tournament hrang hranga lawmman la te chu :

 MARCH PAST :

1. Armed Contingents : 1st - 162 Bn BSF, 2nd - 2nd Bn MAP, 3rd - MRHG 

2. Unarmed Contigents : 1st - NCC Air Wing, BHSS, 2nd - NCC Govt. H/S, 3rd - Scouts & Guides,ChawngfiangaMemorialSchool

3. School Contingents : 1st -HolyFaithSchool, 2nd - Govt. H/S, 3rd - SacredHeartSchool

 SPORTS :

1. Chess : C.Lalrinmawia,SalemVeng

2. Tennis : 

Mens - Lalawmsanga, Bazar Veng 

Women’s - Sandhya Giri, Electric Veng

U-16 (Boys) - Lalrinpuia, College Veng

U-12 (Boys) - Remruatpuia

U-12 (Girls) - R.Lalremsiami, Bazar Veng

3. Snooker & Billiards :

8 Ball - Lalrinsanga Chhangte, Zotlang

9 Ball - David Lalramhluna, Chanmari

Snooker - T.Laltlansanga, Chanmari

4. Badminton :

U-15 - Zaithansanga, Ramthar

U-19 - Jeremy Vanlalpeka, YPC

Men’s Singles - Lalthlamuana, Ramthar

Men’s Doubles - Lalnunpuia & PC Lalrinliana, MPBC

Women’s - Lalhminghlui, YPC