Ni hnih awh Agriculture Technology Management Agency (ATMA), Champhai District Exhibition chu vawiin khan a kharna hun hman niin, he hunah hian Finance Minister Pu Lalsawta chu khuallian a ni a; exhibition-a titha bik thlanchhuahte hnenah lawmman a hlan bawk. He hun, Champhai Town Hall-a neihah hian Minister hi Champhai DC Pu H. Lalengmawia bakah official engemawzatin an tawiawm a ni.

Khuallian chuan leilung rah chhuah (production) a awm loh chuan hmasawnna a awm tak tak theihloh thu a sawi a. Vawiina kalkhawm kuthnathawkte leh anmahni enkawltu Department-te chu Mizoram tidanglam thei khawp a tan la thar turin a chah a. Chutihrual chuan hmanlai atanga hna kalpui dan phung panngai ang zela kal chuan hmasawn a theihloh thu leh, tunlai thiamna in a hrin technology thar te hmang tangkai a, ngaihtuahna thar nen hlawk zawka thar tum turin a sawm a. Chumi atan chuan ATMA hmalakna pawimawh thu Minister Pu Lalsawta chuan a sawi bawk.

Vawiin Exhibition kharna inkhawm hi Pu Lalthanzuala, Project Director, ATMA leh Champhai DAO ni bawk chuan kaihruaiin, Khuallian bakah Minister nupui Pi Ropari leh DC Pu H. Lalengmawia ten titha thlanchhuahte hnenah lawmman an hlan a. Pi C. Laldinpuii, Dy. Project Director, ATMA chuan lawmthu sawiin hun a khar a ni.

Participant 170 telna Champhai District ATMA exhibition-ah hian category hrang hrangah mahni ngei thar thlai, thei leh a dang te entir a ni a. Category hrang hrangah lawmman pakhatna atanga pathumna siam zel niin, consolation prize pathum theuh siam a ni bawk a. A vaiin lawmman pakhatna dawng hi mi 21 awm in, mi 20 in lawmman pathumna an dawng a, mi 16 lawmman pathumna dawng an awm bakah consolation prize mi 40 hnenah hlan a ni a. Stall nei tha ber lawmman chu Sericulture Department hnenah hlan ani bawk.