State hmun dangte rualin vawiin khan Sangau ah pawh Independence Day 2015 lawmna chu Sangau-I Play Ground-ah hman a ni a, Khuallian Pu S.Laldingliana, Vice Chairman, High Power Committee Lunglei District chuan hnam puanzar a pawt parh a ni. 

Khuallian Pu S.Laldingliana chuan thu sawiin sorkar hmalakna hrang hrang a tarlang a. Sangau Water Supply Scheme NEC in sum Rs 4,84,00,000.00 (cheng vaibelchhe li nuai sawmriat pali) a sanction atanga siam tur a nih thu leh Bualpui NG leh Lungzalhtum khuaa solar energy hmang tur Pumping Water Supply Scheme NEC sum atanga Rs.4,93,00,000.00 (cheng vaibelchhe li leh nuai sawmkua pathum) senga siam a nih tur thu a sawi a. Heng bakah hian kum 2014-2015 chhungin Rural Development Sangau Block atangin BADP scheme-ah hna hrang hrang 18 cheng nuai za sawmhnih pasarih (Rs.1,27,00,000.00) man thawh tawh a ni a ti. Chenna In neilo chhungkua 216 te chenna In sak tawh a nih thu te leh Sangau khua ah hian Vety Doctor dah thar a nih bakah Quarter pawh sak tawh a ni a ti bawk. 

Vawiin Sangau-a Independence Day lawmnaah hian Parade Contingent 14 ten hnampuan zar chibai an buk chu HPC Vice Chairman Pu S.Laldingliana chuan a chhang let a ni.