Ram chhung hmun hrang hrangah Election Commission of India (ECI) din champha lawmna hun kum 2011 atanga kum tina hman thin National Voters’ Day (NVD) chu vawiin khan hman a ni a. Mizoram hmun dangte rualin National Voters’ Day vawi 10-na hi vawiin chawhma dar 10 khan DC Conference Hall-ah Bawrhsap leh District Election Officer (DEO) nibawk Pu SL Naveen, IAS hova hman a ni. Kumin atana National Voters’ Day thupui thlan chu ‘Electoral Literacy for Stronger Democracy’, 'Mipui siam sawrkar chak zawk din turin inthlan kaihhnawih uar zawka inzirtir’ tih a ni.

District Election Officer Pu SL Naveen chuan vote nei thar zawng zawngte duhsakna hlanin mipui siam sawrkar tha din turin dikna leh chanvo an neihte tangkai taka hmang chhuak thiam turin a chah a. Electoral Roll siamthat buaipuitu ERO, AERO, BLO leh Election Staff-te inpekna leh NGO te tawiawmna chu chhuanawm a tih thu sawiin, National Voters’ Day hmang tura kalkhawm sawrkar hnathawk leh Chanchinbumite chungah lawmthu a sawi a ni.

He hun hi Pu Lalnunfela Chawngthu, Election Officer Champhai chuan kaihruaiin khua leh tui te’n inthlan kaihhnawiha hriat ngaite chiang zawka an hriat theihna turin hemi kawnga inzirtirna ‘Systematic Voters Education and Electoral Participation (SVEEP) kalpui zel tum a ni, a ti a. Zirna In hrang hrang leh pawn lamah te pawh Electoral Literacy Club kalpui mai bakah NGO leh Departmentah-te Voter Awaremess Forum (VAF) te kalpui tum anih thu a sawi a. Pu Benjamin Zalawma Ralte, SDC Champhaiin National Voters’ Day (NVD) puala Chief Election Commissioner (CEC) Pu Sunil Arora thuchah chhiarchhuakin, Electoral Literacy Club tih thupui hmangin Powerpoint Presentation a pe a. Pu Manesia Khaimeichho, SDC Champhai kaihhruainain National Voters’ Day thutiam chham rualna neih a ni a.

He hunah hian Undivided Champhai District chhunga Assembly Constituency pali atanga Booth Level Officer (BLO) titha zual thlanchhuahte; Pu Laldinpuia Saiawi, Teacher, Comprehensive M/S Kawlkulh, 21/23 Kawlkulh III BLO (Lengteng A/C); PC Lallawma, Headmaster, Ngaizawl M/S, 23/15 Ngaizawl BLO (Champhai North A/C); Pu T.Remmawia, Teacher, Govt. Comprehensive M/S, Champhai Venglai, 24/4 Kanan II BLO (Champhai South A/C) leh Pu F.Lalvulliana, Teacher, Khuangleng M/S, 25/5 Khuangleng BLO (East Tuipui A/C) te hnenah Khuallianin chawimawina Citation leh sum fai a hlan a ni. Undivided Champhai District ah hian Assembly Constituency 5 awmin, Polling Station 137 leh BLO 137 an awm mek a ni.

National Voters’ Day 2020 lawmna hunah hian Election Officials, BLO, Vote nei tharte leh Chanchinbumite an tel a ni.