Vawiin khan Khawzawlah pawh National Voters Day chu India ram hmundang rualin D.C. Conference Hall-ah hman a ni.

Addl. D.C. Pu Paul L. Khuma kaihhruaia National Voters Day puala hun hmanah hian Sunil Arora, Chief Election Commissioner of India in National Voters Day puala thuchah a sawi ngaihthlak zawhah khuallian District Bawrhsap H. Lianzela'n thu a sawi a. Pu H. Lianzela chuan, India ram indan dawn a ram hruaituten Democracy ram ni tura ngaihtuahna an lo sen chu a taka tih hlawhtlin anih hnuah India ram mipui, kum 18 tling chin te chu ram hruaitu, an aiawh tur thlan theihna pek an ni a, hei hi India ram hi Welfate State kan nih theihna tura Democratic Means a pawimawh ber a ni a ti a. Thalai zawk, kumtling tharten duh anga an ngaihven tawk lova hriatna a awm hnuah thalaite hi engtin nge kan chawh phur ang a, engtin nge hma kan lak ang tih ngaihtuahnain kum 2011 atang khan National Voters Day hi hman alo ni ta tih a sawi a, thalaite tih phurnan National Voters Day-ah hian Vote nei thar thalaite hnenah EPIC pek thin an nih thu leh kuminah chuan Revision ala kal mek avangin an sem chhuak thei ta lo tih a sawi a ni. D.C. chuan vawiin hi Election Commssion of India kum 70 tlin lawmna a ni tih sawiin vawiin National Voters Day hi a pawimawh leh zual tih a sawi a. Election kaihhnawihah inhnamhnawih kan tam tih sawiin, V/C te leh NGO te thlengin kan tel a. Roll Revision bikah phei chuan Mizoram-ah an tel lovin Sawrkar hnathawk te hian an ti thei lo tih sawiin thawhhona tha tak an neih chhunzawm zel pawh a beisei tih a sawi a ni.

He hunah hian D.C. chuan 22-Tuichang Assembly Constituency a Best Booth Level Officer atana thlan Pi Rokimi, Khawzawl Primary School - I zirtirtu hnenah Citation leh pawisafai Rs.3,000/- a hlan a. Hemi hnu hian Khawzawl SDO Sadar Pi S.T. Lalvensang hovin National Voters Day puala thutiam neih a ni. Vawiina Khawzawl District Function anih hnua National Voters Day hmasawn ber lawmnaah hian Khawzawl khawpui chhunga BLO te bakah VC Member te, NGO hruaitute leh MJA Member te an tel a ni.